Степной ауылынан 9 йәшлек Рәфис Тазетдиновҡа уңыштар теләйбеҙ!

Степной ауылынан Рәфис Тажетдиновҡа 9 йәш. Бөгөн ул тоғро дуҫы "Алан" аты менән "Башҡорт тоҡомло аттарҙың иң яҡшы вәкиле" республика конкурсында тәүге тапҡыр ҡатнаша.

Уның остазы - ағаһы Айгиз, "Терра-Башҡортостан" республика ат-спорт ярыштарында әүҙем ҡатнашыусы һәм бер нисә тапҡыр еңеүсе.

Рәфис атын бик ярата, ул уны тәрбиәләй, "Алан" менән бергә йөҙә, тиҫтерҙәрен уның менән йөрөтә. Фестивалгә ул атаһы Илгиз Тазетдинов, райондың абруйлы йылҡысыһы менән килгән.
"Рәфис бер ат ярышын да ҡалдырмай. Бөгөн беҙ лайыҡлы сығыш яһарбыҙ тип ышанам", - ти ул.

Әйткәндәй, Рәфис быға тиклем һабантуйҙа, шулай уҡ Генерал Миңлеғәле Шайморатов призына һәм "Салауат йыйыны" ХХ республика фольклор фестивале сиктәрендә ойошторолған ат-спорт ярыштарында башҡорт тоҡомло аттар араһында ярыштарҙа 1-се урындар алғайны. Ә “Урал батыр” башҡорт эпосы призына һәм «Аҡбуҙат» эпосы призына башҡорт тоҡомло аттар араһында ярыштарында 2-се урындар яуланы.