Өфөлә йыһан аҙналығы үтте

Йыһан аҙналығы Өфөләге Евразия фәнни-белем биреү үҙәгенең вуз-ара студенттар кампусында үтте. Саралар циклы “Йәштәр һәм балалар” (национальный проект “Молодёжь и дети”) милли проекты ярҙамында үтте, тип хәбәр иттеләр Башҡортостандың Мәғариф министрлығында.

Унда 300-ҙән ашыу уҡыусы, студенттар һәм тармаҡ эксперттары ҡатнашты. Сарала Рәсәй Космонавтика федерацияһы ағзаһы һәм Өфө йыһан мәктәбе етәксеһе Алексей Алликас “Хыялдан алып беренсе юлдашҡа тиклем” тип аталған лекцияһын үткәрҙе. Шулай уҡ ул Халыҡ-ара йыһан станцияһында йәшәйеште тәьмин итеү, унда кеше организмына йыһандың йоғонтоһо һәм киләсәк планета-ара миссиялар контексында оҙайлы изоляцияның психологик аспекттары тураһында һөйләне.

“Йыһан аҙналығы”ның практик өлөшө ғәмәли күнекмәләрҙе һәм дисциплина-ара эшмәкәрлекте үҫтереүгә йүнәлтелде. Мәҫәлән, “Киләсәк модаһы” оҫталыҡ-класы барышында дизайнерҙар һәм технологтар башҡа планеталарҙы үҙләштереү өсөн кейем концепцияларын тәҡдим итте. “Йыһан инженер миссияһы” интенсивында ҡатнашыусылар виртуаль ысынбарлыҡта ҡатмарлы техник процестарҙы моделләштерҙе, виртуаль системалар менән идара итте һәм йыһан шарттарына яҡын шарттарҙа инженерлыҡ мәсьәләләрен хәл итте.

“Йәштәр һәм балалар” милли проекты йәштәрҙең һәләтен үҫтереү һәм үҙ һәләттәрен үҫтереү өсөн мөмкинлектәр булдырыуға йүнәлтелгән. Милли проект үҙәгендә - мәктәптәр төҙөү һәм ремонтлау, педагогтарҙың квалификацияһын камиллаштырыу, белем биреү өсөн яңы алымдар һәм уңайлы шарттар булдырыу. Милли проект шулай уҡ донъя кимәлендәге кампустар селтәрен үҫтереүҙе һәм “Өҫтөнлөк 2030” программаһы буйынса юғары уҡыу йорттарына булышлыҡ итеүҙе күҙ уңында тота.

Яңыртылған милли проекттар Рәсәй Президенты Владимир Путиндың ҡарары буйынса 2025 йылдан тормошҡа ашырыла.

Беҙҙең МАХ каналына https://max.ru/gazetabashkortostan  ҡушылығыҙ!