Ғилми ҡунаҡхана - ғалимдарыбыҙҙың эш һөҙөмтәләрен күрһәтеү өсөн майҙансыҡ

Рәсәй фәне көнө алдынан, 6 февралдә, Евразия фәнни-белем биреү үҙәгенең - Ғилми ҡунаҡханаһы Өфөнөң вуз-ара студенттар кампусында асыҡ ишектәр көнөн үткәрә. Сара Рәсәй Федерацияһында Фән һәм технологияларҙың 10 йыллығы башланғысын тормошҡа ашырыу планына, шулай уҡ “Йәштәр һәм балалар” милли проектының (национальный проект “Молодёжь и дети”) маҡсаттарына ярашлы ойошторола, тип хәбәр иттеләр Башҡортостандың фәнни-тикшеренеү үҙәге идара итеүсе компанияһынан.

Ҡатнашыусыларҙы профессиональ диалог өсөн бай программа көтә: китаптың презентацияһы, фәнни стендап, ғалимдар өсөн асыҡ микрофон. Юғары уҡыу йорттары араһындағы кампус лабораториялары ғалимдары фәнде үҫтереүҙең өҫтөнлөклө йүнәлештәре, шулай уҡ үҙ эшләнмәләре тураһында һөйләйәсәк.

– Фән диалогтан башлана. Беҙҙең төбәктә был диалогтың лаборатория стеналарынан сығып, кампустағы фәнни ҡунаҡ бүлмәһе кеүек заманса, тере формаларға эйә булыуына шатмын. Был арауыҡта йәш тикшеренеүселәр үҙ эшләнмәләрен тәҡдим итеп кенә ҡалмай, ә уларҙың ысын ҡиммәтен күрә, фәнни берләшмәнән кире бәйләнеш ала. Киләсәктә төбәгебеҙҙең технологик ҡиәфәтен билдәләйәсәк проекттар тап ошонда, дисциплиналар һәм идеялар сигендә тыуа, тип ышанам, – тип билдәләне Башҡортостандың фән һәм юғары белем биреү буйынса дәүләт комитеты рәйесе Светлана Мостафина.

Осрашыуға вуз-ара студенттар кампусы тикшеренеүселәре, шулай уҡ Башҡортостандың алдынғы юғары уҡыу йорттары эксперттары ла саҡырылған.

Хәтерегеҙгә төшөрәбеҙ, тәүге тапҡыр Ғилми ҡунаҡхана “Фән айлығы” сиктәрендә уңышлы эшләй башланы, был фәнни берләшмәлә ҙур ҡыҙыҡһыныу уятты.

– Евразия фәнни-белем биреү үҙәгенең Ғилми ҡунаҡханаһы ғалимдарыбыҙҙың эш һөҙөмтәләрен күрһәтеү өсөн майҙансыҡ булып хеҙмәт итә. Бында фәнни эштәр хәүефһеҙлекте арттырыуға, йәшәү сифатын яҡшыртыуға һәм илдең технологик суверенитетын нығытыуға булышлыҡ иткән аныҡ тауарҙарға һәм технологияларға әүерелә. Был – илебеҙ фәненең көсөн аңлау һәм тап беҙҙең ғалимдарҙың төбәктең тотороҡло үҫеш йүнәлештәрен билдәләүенә ышаныс формалашҡан үҙенсәлекле йәлеп итеү нөктәһе, – тип белдерҙе “Башҡортостан Республикаһы фәнни-мәғариф үҙәгенең идара итеүсе компанияһы” автономлы коммерцияға ҡарамаған ойошмаһы директоры Наталия Латипова.

Фото: pravitelstvorb.ru.