Лайыҡлы награда

Өфөлә “Торатау” конгресс-холында тантаналы рәүештә “Яҡташтар”  һәм "Атайсал" проекттары сиктәрендә республика һәм тыуған төйәгенең ысын патриоттары, хөрмәтле һәм лайыҡлы граждандар бүләкләнеп, үҙҙәренең фиҙаҡәр эштәре менән халыҡ һөйөүен яулаған замандаштарыбыҙ билдәләнде. Шуныһы ҡыуаныслы: проект еңеүселәре араһында Хәйбулла районының почетлы гражданы, һуғыш һәм хеҙмәт ветерандары район советы рәйесе Ырыҫбикә Аллағолова ла бар. Ул "Яҡташтар" проектының “Йәмәғәт эшмәкәрлеге” номинацияһында еңеп сыҡты.

• Иң күп тауыш йыйып, "Яҡташтар" проекты сиктәрендә  номинация еңеүсеһе итеп билдәләндем. Әлбиттә, йәмәғәт эшмәкәрлегебеҙ ниндәйҙер баһа алыу өсөн түгел, ә оло быуынды социаль яҡлау, хәстәрләү, иғтибарҙан ситтә ҡалдырмау, хаҡлы ялға сыҡҡас, үҙҙәренә йомолоп, яңғыҙы ҡалмаһын өсөн төрлө сараларға йәлеп итеү маҡсатында алып барыла. Күп йыллыҡ хеҙмәтемде баһалағандары өсөн рәхмәтлемен, - тине Ырыҫбикә Аллағолова.