Һайлауҙар күңелле, милли байрамға әүерелде

Садовый ауылында берҙәм һәм эшһөйәр халыҡ йәшәй. Уларҙың береһе лә тауыш биреүҙән ситтә ҡалмай. Һәр хәлдә лә оло быуын кешеләре  ил яҙмышы хәл ителгән мәсьәләләргә яуаплыраҡ ҡарай. Йәштәр ҙә уларҙан ҡалышмай, ваҡиғаның мөһимлеген аңлай.

Күркәм ауылда һайлауҙар ваҡытында йәрминкәләр ойоштороу һәйбәт йолаға әүерелгән. Бигерәк тә махсус хәрби операцияла йөрөгән яҡташтарыбыҙҙың именлегенә, илебеҙ тыныслығына аяттар уҡытыу, доға ҡылыу һәм хәйриә акцияларына ҡушылыу бик сауаплы ғәмәл булып тора. Ауылдың иң әүҙем, дәртле ҡатын-ҡыҙҙарының береһе Миңзифа  Ишемғолованың һәм Тәнзилә Рәимованың моңло гармун көйҙәренә бейеү, таҡмаҡтар йырлау, борҡоп торған самауырҙан сәйҙәр эсеү милли байрам мөхитен тағы ла йәнләндерҙе, халыҡты берләштерҙе.