Эҫе һәм ямғырһыҙ!

Әгәр йәйҙең тәүге айының башы ямғырлы булһа, бер аҙнанан һауа торошо ҡырҡа үҙгәрә. Башҡортостанда йәшәүселәрҙе +33 градусҡа тиклем эҫелек көтә. Синоптиктар июндең икенсе яртыһына һәм июль айына фараздары менән уртаҡлашты.

Сипоптиктар мәғлүмәте буйынса, 18-20 июндә төбәккә аномаль эҫе килә. Көндөҙ термометр бағанаһы +33 градус билдәһенә етәсәк. Шул уҡ ваҡытта төндә температура +23 градустан түбән төшмәй — был беҙҙең климат өсөн бик һирәк осраған “тропик” режим.

Бындай температура климат нормаһынан 7-10 градусҡа юғарыраҡ буласаҡ. Гидрометүҙәктең ғилми етәксеһе Роман Вильфанд быны атмосфера процестарын үҙгәртеп ҡороу һәм Эль-Ниньо йоғонтоһо менән бәйләй.

Июль айы ла ғәжәпләндерә. Эҫелек оҙаҡҡа киләсәк. Айҙың тәүге яртыһы тотороҡло эҫе була: көндөҙ +29, +31 градус булыуы көтөлә, яуым-төшөм ҙур дефицитҡа әйләнәсәк. Росгидромет фаразы буйынса уртаса айлыҡ температура +17, +21 градус сиктәрендә көтөлһә лә, ҡайһы бер көндәрҙә һауа күпкә көслөрәк йылынасаҡ.

Дөйөм алғанда, июнь башындағы оҙайлы ямғырҙарҙан һуң, тәбиғәт Башҡортостан халҡына ысын бүләк әҙерләй — оҙайлы ҡоро һәм йәйге эҫе һауа торошо июль аҙағына тиклем дауам итә.

Фото: Әлиә Хужәхмәтова.