Тиң ҡартайыуға ни етә!

Ауыл өлгөлө ғаиләләр менән ҡотло. Айырыуса оҙаҡ йылдар тиң ғүмер иткән парҙар һәр саҡ һоҡланыу уята. Ивановка ауылында ла  56 йыл бергә ғаилә усағын һүндермәй, татыу ғүмер иткән матур ғаилә йәшәй – улар Сәйфулла һәм Хәҙисә Күсәкәевтар.

Күсәкәевтар икеһе лә сығышы менән бөткән Бикбау ауылынан. Ғаилә башлығы Сәйфулла Хөсәйен улы 1948 йылдың 12 ғинуарында донъяға килә. Уның атаһы уҡымышлы кеше, мөғәллим, мулла була. Сәйфулла ағай бала саҡтан аттарҙы ярата, һүрәт төшөрөргә лә маһир була.  Бәләкәйҙән эшләп, тырыш, маҡсатҡа ынтылыусан егет булып буй еткерә.

Хәҙисә Ишкилде ҡыҙы 1950 йылдың 10 авгусында ишле ғаиләлә тәүге бала булып донъяға килә. Ғаилә иң өлкәне булараҡ, өлкәндәр менән бер рәттән колхозда эшләй, бесән саба. Бынан тыш, кесе һеңле-ҡустыларын ҡарай, керен дә йыуа, ашарға ла әҙерләй, тегә лә, өйҙө лә йыйыштыра. Бик сос, етеҙ, ҡыйыу, эшһөйәр ҡыҙ була. Ул ғаилә ҡиммәттәре һәм дуҫлыҡ баһаланған ҙур ғаиләлә үҫә.

Күсәкәевтар 1969 йылда ғаилә ҡора. Быйыл уларҙың бергә йәшәүҙәренә 56 йыл тула. Уңған ғаилә үҙ ваҡытында иркен йорт һалып ингән. Өс ул һәм өс ҡыҙға ғүмер биргәндәр. Ҡыҙғанысҡа ҡаршы, улдары Ринат һәм Роберт яҡты донъяла юҡ инде. Кинйә балалары Әлфирә менән Альфред игеҙәктәр. Альфред хәрби һөнәр һайлаған, капитан, Түбәнге Новгород өлкәһенең Кстово ҡалаһында йәшәй. Сүриә, Чечен һуғышында ҡатнашҡан. Әле ул махсус хәрби операция зонаһында. Ҡыҙҙары Зөһрә 1-се Аҡъяр мәктәбендә китапханасы, бер үк ваҡытта башланғыс кластарҙа инглиз теленән уҡыта. Башҡортостан Республикаһының мәғариф отличнигы. Зөлфирә  Себерҙә диспетчер булып эшләй. Әлфирә иһә Аҡъярҙа “Әҙел” коворкинг үҙәгендә массажсы.

-Ҡатыным менән бер ауылдыҡы булғас, бала саҡтан бергәбеҙ. Бикбауҙа күрше генә йәшәнек. Ҡуша мәктәпкә алып йөрөнөм, берәүгә лә бирмәнем. Күрше Йәнтеш ауылы мәктәбенә 5-8-се класты бергә йәйәү йөрөп уҡыныҡ. Ивановкаға йәшәргә күскәс, 10-сы класты тамамланыҡ. Артабан армияға бармаҫ борон өйләнештек. Кәләшем ике йыл көтөп алды. Өс йыл йәшәгәс, улыбыҙ тыуғас ҡына яҙылыштыҡ,  -  тип йылмая ғаилә башлығы.

-Бейем яңғыҙ булғас, уны ҡараным. Ирем армияла саҡта икәүләп донъя көттөк. Һауынсы булып эшләнем. Бейем менән 18 йыл бергә торҙоҡ. Балаларҙы ҡарашты, - ти Хәҙисә апай.

Ғаилә башлығы Ленин исемендәге колхозда шофер, зоотехник, ферма мөдире, комсорг, парторг була. Ситтән тороп Йылайыр совхоз техникумында зоотехник һөнәренә эйә була. 40 йылдан ашыу хеҙмәт стажы менән хаҡлы ялға сыға. Йәмәғәт эштәренән дә ситтә ҡалмай. Күп йыллыҡ намыҫлы хеҙмәте төрлө Маҡтау ҡағыҙҙары менән баһалана. Уны әле лә стендтарҙы биҙәү өсөн саҡыралар. Оҙаҡ йылдар урындағы ветерандар советы рәйесе була. Сәйфулла ағай оҫта гармунсы ла. “Йәш саҡта клубта йәштәрҙе гармун уйнатып бейетә торғайным. Сараларҙа ла ҡатнаша инем. Әле гармунды һирәк ҡулға алам. Бейеү көйө уйнаһам, әбейем бейергә төшә”, - ти мәрәкәләп Сәйфулла Хөсәйен улы. 

Хәҙисә Ишкилде ҡыҙы 18 йыл Ленин исемендәге колхозда һауынсы, 1987 йылдан хаҡлы ялға тиклем “Йәйғор” балалар баҡсаһында тәрбиәсе ярҙамсыһы булып эшләй. Алдынғылар рәтендә, маҡтаулы хеҙмәткәр була. Күп бала әсәһе өйөндә лә, эшендә лә өлгөрә. Алдынғы һауынсы булараҡ, “Москвич” машинаһын сиратһыҙ ала, өй һалырға бура бирәләр. “20-ләп һыйырҙы  ун өс йыл ҡул менән һауҙым. Һуңынан автомат һауынға күстек. Бынан тыш, өйҙә биш һыйырым булды. Былтырҙан ғына ике һыйыр һауам”, - ти Хәҙисә апай.  Ул 6 бала тәрбиәләп үҫтергәне өсөн “Әсәлек даны” миҙалы менән дә бүләкләнгән. 75 йәшкә еткән Хәҙисә апайҙың  етеҙлегенә, уңғанлығына, йәш ҡатын-ҡыҙҙар көнләшерлек.

Күсәкаевтар икеһе лә хеҙмәт ветераны, “Фиҙаҡәр хеҙмәт өсөн” миҙалы менән наградланғандар. Һикһәнде ҡыуалаған был матур парҙың күҙҙәренән нур бөркөлөп, дәрт-дарманы ташып тора. Икәүһе лә ихлас, мәрәкәсел, бер-береһенең һүҙен ҡеүәтләп торған һоҡланғыс пар. Өлкән йәштә булыуҙарына ҡарамаҫтан, мал-тыуар аҫрайҙар, ҡош-ҡорт тоталар, мул итеп баҡса үҫтерәләр. Күп йәштәргә өлгө улар.

Мәҡәлә тулыраҡ гәзиттең 9-сы һанында.