Сәләмәт йәшәү – үҙе бәхет

«Айыҡ ауыл» республика конкурсында ҡатнашҡан Фёдоровка ауылында «Матур бул» проекты ҡатнашыусыларҙы файҙалы һәм ҡыҙыҡлы саралар менән ҡыуандырыуын дауам итә.Был юлы осрашыу һаулыҡҡа арналды.

Аҡъяр үҙәк район дауаханаһының табип-терапевты Альбина Бәрәкәтова сәләмәт туҡланыу тураһында лекция үткәрә, баланслы рациондың мөһимлеген ентекләп аңлата һәм ауырлыҡты контролдә тотоу өсөн тән ауырлығы индексын иҫәпләүҙең ни тиклем еңел булыуын күрһәтә. Теория яйлап практикаға күсә: лекциянан һуң ҡатын-ҡыҙҙар йәшелсәләрҙән тәмле һәм файҙалы салаттар әҙерләй. Үҙ аллы әҙерләнгән ризыҡ алған белемдәренә бонус һәм проектта ҡатнашыусыларҙы берләштереүҙең яҡшы ысулы булып тора.

Сараның икенсе өлөшөндә дауалау физкультураһының профессиональ инструкторы, 15 йыллыҡ эш стажы булған массажсы Ольга Волынская презентация күрһәтте. Ул сәләмәт йәшәү рәүешен һаҡлау тураһында байтаҡ ҡыҙыҡлы мәғлүмәттәр генә һөйләп ҡалманы, ә барыһын да дөйөм зарядкаға баҫтырып, бөтәһен дә көс-дәрт менән зарядланы.Осрашыуҙа ҡатнашыусылар даими физик күнегеүҙәрҙең мөһимлеге тураһында белеп, үҙҙәренең йәше һәм һаулығы үҙенсәлектәрен иҫәпкә алып, күнегеүҙәр башҡарыу буйынса фәһемле кәңәштәр алды.

Сара йылы һәм дуҫтарса мөхиттә үтте. Ҡатын-ҡыҙҙар үҙ-ара аралашып, тәжрибә уртаҡлашты, үҙҙәрен хәстәрләү һәм сәләмәт йәшәү рәүеше алып барыу өсөн бер-береһен илһамландырҙы.   «Матур бул»  исемле шәп проект тап шундай маҡсаттар ҡуя – ул ҡатын-ҡыҙҙарға рухи яҡтан үҫешергә, нығынырға, үҙгәрергә, үҙен яратырға өйрәтеүгә йүнәлтелгән.