Бейеүсе махсус хәрби операция биләмәһенә юлланған

Ейәнсура районынан һәүәҫкәр бейеүсе Самат Аҙнабаев махсус хәрби операция биләмәһенә хеҙмәт итергә киткән. Республикала күптәр уның бесән сапҡанда бейегәнен яҡшы хәтерләй. «Сенокос - Ейәнсура» исемле видеояҙма шунда уҡ интернетта таралып, популярлыҡ яуланы. Яҡташыбыҙ Беренсе каналға ла барып ҡайтты.

Ейәнсура районы хакимиәтендә белдереүҙәренсә, быйыл Самат Аҙнабаев Оборона министрлығы менән контракт төҙөп, махсус хәрби операцияға киткән.

– Уның алты балаһы бар, бына тигән ғаилә. Йәшенә ҡарамаҫтан, Самат Аҙнабаев ныҡлы ҡарар ҡабул итте һәм Тыуған илебеҙ һағына баҫты. Башҡорт Үргене ауылынан дошман менән алышҡан ир-егеттәр күп. Улар менән бәйләнеш тотабыҙ һәм мөмкин тиклем тығыҙ бәйләнештә булырға тырышабыҙ, - тип һөйләне муниципалитет хакимиәте советы секретары Рәмил Мырҙабулатов.