Бөтә донъя башҡорттары ҡоролтайы вәкилдәре эш сәфәре менән районда булды

Районда эш сәфәре менән Бөтә донъя башҡорттары ҡоролтайы Президиумы рәйесе, РФ Дәүләт Думаһы депутаты Эльвира Айытҡолова етәкселегендә Бөтә донъя башҡорттары ҡоролтайы вәкилдәре булды.

 Рәсми ҡунаҡтар Аҡъяр ауылының  күп профилле полилингваль мәктәбендә мәғариф өлкәһенең йәш белгестәре менән осрашты, "Айыҡ ауыл" конкурсында еңеүсе Бәләкәй Арыҫланғол, Оло Әбеш ауылдарында еңгән аҡсаларға тормошҡа ашырылған объекттар менән танышты. Шулай уҡ Оло Әбеш ауылында халыҡ менән осрашып, көнүҙәк мәсьәләләр хаҡында һүҙ алып барҙылар, килгән халыҡ үҙҙәрен борсоған һорауҙарға яуаптар алды.

Әбеш ауылында башҡорт халҡының мәҙәниәтен, тарихын үҫтереүгә, милли йолаларҙы пропагандалауға, телгә һөйөү тәрбиәләүгә ҙур өлөш индергән өсөн Айгөл Әминева, Нәсимә Ибраһимова, Аҡсәскә Әбделмәнова, Миңзәлә Мөхәмәтова, Дамир Исмәғилевҡа Бөтә донъя башҡорттары ҡоролтайының Рәхмәт хаттары тапшырылды

• Бөгөнгө осрашыуҙа халыҡты нимәләр борсой, шул турала һөйләшеп бик ҡәнәғәт ҡалдыҡ.  “Айыҡ ауыл” республика конкурсында еңеү яулаған Бәләкәй Арыҫланғол һәм Әбеш ауылдарында бик әүҙем, эшһөйәр халыҡ йәшәй. Улар үҙ ауылы өсөн яуаплылыҡ тоя, хакимиәт ярҙамы менән эштәрен матур алып баралар. Ике ауылда ла фап бар, балалар өсөн майҙансыҡтар барлыҡҡа килгән. Был ошонда йәшәгән халыҡтың тырышлығы тураһында һөйләй. Халыҡ менән бындай йәнле осрашыуҙарға бер нимә лә етмәй. Милләттәштәребеҙ менән күҙгә-күҙ ҡарап аралашыу ул үҙе бәхет. Шуныһы ҡыуаныслы: бында илебеҙ киләсәгенә битараф кешеләр юҡ, - тине Эльвира Айытҡолова.