Йолаларҙы һаҡлап: «Аҫылташ» форумы үҙ эшен тамамланы.

«Был форумдың төп идеяһы — Башҡортостан йәштәренең конкурентлыҡ һәләтен арттырыу. Халҡыбыҙҙың, республикабыҙҙың киләсәге йәштәрҙең ниндәй булыуына бәйле. Мин үҙем йәштәр сәйәсәтендә ҡатнаштым һәм үҙ ваҡытында беҙ бындай саралар тураһында хыяллана ғына инек», - тип мөрәжәғәт итте ҡатнашыусыларға Башҡортостан Республикаһы Башлығы Хакимиәте Етәксеһенең эске сәйәсәт буйынса беренсе урынбаҫары Азат Баҙранов.

Форумдың ҡатнашыусылары менән бергә Азат Шамил улы Йылайыр районының «Дуҫлыҡ» лагерында «Башмолодежь» аллеяһына 50 ағас үҫентеһе ултыртты.

«Росмолодежь» бөтә рәсәй йәштәр проекттары конкурсын йомғаҡлау форумдың кульминацияһы булды. Гранттар конкурсының 3,5 миллион һумлыҡ фондын 9 еңеүсе бүлеште.

«Был минең грант конкурсында беренсе ҡатнашыуым һәм беренсе еңеүем. Маҡсатым – һаулыҡ мөмкинлектәре сикләнгән кешеләргә Башҡортостандың туристик маршруттары тураһында мәғлүмәт еткереү. Алынған аҡсаға беҙ төбәктә инклюзив туризмды үҫтерәсәкбеҙ. Был идея оҙаҡ ваҡыт уйҙа булды, әммә форум мине илһамландырҙы, мин кешеләргә яңы мөмкинлектәр хаҡында хәбәр итә алыуыма бик шатмын», — тип тәьҫораттары менән уртаҡлашты грант конкурсы еңеүсеһе Сулпан Байғәлина.

Ябыу тантанаһы бүләктәргә бай булды: Башҡортостан Башлығының «Башҡортостан Республикаһының ирекмәне» почет билдәһе һәм Республика Башлығының Рәхмәт хаты тапшырылды. Форумды ябыу тантанаһы "Лауд" төркөмө сығышы менән тамамланды.

«"Аҫылташ" форумын күп йылдар Башҡортостандың Йәш яҡташтар берлеге үткәреп барҙы, был йәштәр өсөн файҙалы һәм бай мәғәнәле майҙансыҡ. Быйыл форумды көсәйтергә һәм ҙурайтырға булдыҡ, форумды беҙ «Берҙәмлек» башҡорт йәштәре Фестивале сиктәрендә үткәрҙек. Фестивалдә Росмолодежь.Гранты конкурсы, билдәле спикерҙарҙың һәм артистарҙың сығыштары үтә, йәштәр республикалағы үҫеш мөмкинлектәрен өйрәнәләр. Был киләсәктә йәштәрҙең һәләттәрен тормошҡа ашырыуҙа тейешле һөҙөмтәләр килтерер тип ышанам», - тип бүлеште  Башҡортостан Республикаһының йәштәр сәйәсәте буйынса дәүләт комитеты рәйесе Вито Сабиров.

Аҫылташ-2024 форумының ойоштороусылары: Башҡортостан Республикаһының йәштәр сәйәсәте буйынса дәүләт комитеты, Башҡортостан Республикаһының йәш яҡташтар берлеге, Йылайыр районы хәкимиәте, Башҡорт телен һаҡлау һәм үҫтереү ойошмаһы, Башҡортостандың студенттар һәм аспиранттар ассоциацияһы, Бөтә донъя башҡорттары ҡоролтайы.

Форум Башҡортостан Республикаһының Башлығы гранттары фонды грантына тормошҡа ашырыла.