+23 °С
Болотло
ЙӘМҒИӘТ
6 Апрель 2023, 06:57
Республикала Бөтә Рәсәй эшкә урынлашыу йәрминкәһе була
-
Республикала Бөтә Рәсәй эшкә урынлашыу йәрминкәһе була
Башҡортостанда 14 апрелдә «Рәсәй эше. Мөмкинлектәр ваҡыты» Бөтә Рәсәй эшкә урынлашыу йәрминкәһенең төбәк этабы ойошторола. «Башинформ» агентлығында уҙған матбуғат конференцияһында республиканың ғаилә, хеҙмәт һәм халыҡты социаль яҡлау министры Ленара Иванова ошо хаҡта белдерҙе.
Күләмле сара Өфөлә, Стәрлетамаҡта, Мәләүездә, Бөрөлә, Нефтекамала, Күмертауҙа, Белоретта, Учалыла, Сибайҙа, Салауатта, Ишембайҙа, Бәләбәйҙә һәм Октябрьскийҙа үткәрелә. Ленара Иванова әйтеүенсә, 2023 йылда йәрминкә тәүге тапҡыр тотош илдә бер үк ваҡытта башлана. Башҡортостанда ул йыл һайын уҙғарылған «PROFФЕСТ» төбәк фестивале менән берләштерелә.
«Беҙҙең төп маҡсат — тиҙ генә эш табыу ғына түгел, ә уҡыусыларға, юғары уҡыу йорттары студенттарына, уларҙың ата-әсәләренә һәм башҡаларға үҙ карьераһын планлаштырыуҙа ярҙам итеү. Бында, вакансиялар менән бер рәттән, килгән ҡунаҡтарҙы мәшғүллек үҙәктәре консультанттары көтә», — тип билдәләне Башҡортостандың хеҙмәт министры.
Йәрминкәнең 13 майҙансығында Башҡортостандың 260-тан ашыу предприятиеһы ҡатнаша, улар 5700-ҙән ашыу вакансия тәҡдим итә. Эш ваҡыты — иртәнге сәғәт 11-ҙән көндөҙгө 4-кә тиклем (Өфөлә иһә иртәнге 10-дан). Сара баш ҡаланың «Торатау» конгресс-холында була.
«Рәсәй эше»нең икенсе этабы 23 июнгә билдәләнгән (Өфөлә «Арт-квадрат» майҙансығында).
