+23 °С
Болотло
ЙӘМҒИӘТ
5 Апрель 2023, 07:16
Башҡортостанда «Айыҡ ауыл» конкурсы финиш һыҙығына сыға
Әйткәндәй, тауыш биреү 9 апрелгә тиклем оҙайтылды. Бәйгелә ҡатнашыусы Әбүбәкер ауылы өсөн ошо https://golos.bashkortostan.ru/poll/49 һылтанма буйынса инеп, тауыш бирә алаһығыҙ.
«Айыҡ ауыл-2022» республика конкурсы финиш һыҙығына сыға. 4 апрелдә «Башҡортостан» дәүләт концерт залында конкурста ҡатнашыусыларҙың презентацияларын яҡлау башланды. Дүрт көн дауамында эксперт комиссияһы ҡатнашыусыларҙың проекттарын баһалай. 7 апрелгә тиклем министрлыҡтар һәм ведомстволар, шулай уҡ Бөтә донъя башҡорттары ҡоролтайының башҡарма комитеты вәкилдәре муниципаль район хакимиәттәренән ебәрелгән ғаризалар, видеороликтар менән таныша.
Республика Хеҙмәт министрлығының матбуғат хеҙмәтенән «Башинформ» агентлығына хәбәр итеүҙәренсә, быйыл «Айыҡ ауыл» исеменә 54 ауыл дәғүә итә — һәр райондан берешәр. Презентацияларҙы яҡлауҙа ауыл әүҙемселәре һәм район хакимиәттәре вәкилдәре ҡатнаша.
«Айыҡ ауыл» конкурсында ҡатнашыусылар араһында бәләкәй ауылдар презентацияһында һеҙҙең менән осрашыуға шатмын, — тип сәләмләне конкурса ҡатнашыусыларҙы республиканың ғаилә һәм хеҙмәт министры Ленара Иванова. — Конкурстың ойоштороу комитеты ағзаһы булғас, быйыл миңә Благовещен районының Ошмянка ауылындағы сараға барыу бәхете тейҙе. Ауылдың ошо конкурс менән йәшәүен, берләшеүен, махсус хәрби операцияла ҡатнашыусыларға ярҙам итеү өсөн күп көс һалыуын тойҙом, Чишиндар ғаиләһендә ҡунаҡта булдым. Барыһы ла конкурстың күптән инде сәләмәт йәшәү рәүешенә йәлеп итеүҙән тыш, ауылды үҫтереү, халыҡты берләштереүҙең төп йүнәлешенә әүерелгәнен аңлай. Конкурста райондарҙың һәм ҡалаларҙың үҙенсәлекле тәжрибәләрен, коллегаларыбыҙҙың эшкә урынлаштырыу, яңы эш урындары булдырыу, традицияларҙы һәм ғаилә ҡиммәттәрен һаҡлау мәсьәләләрендә ғаиләләр менән эшләү йәһәтенән уңышлы тәжрибәһен күрәбеҙ».
Беренсе көндә республика конкурсында 15 ҡатнашыусы үҙ проекттарын яҡланы. Уларҙың барыһы ла 250-гә тиклем кеше йәшәгән «Бәләкәй тораҡ пункттар» номинацияһында ҡатнаша.
Хәтерегеҙгә төшөрәбеҙ, Башҡортостан Башлығы Радий Хәбировтың ҡарары менән 2020 йылдан конкурстың бүләк фонды утыҙ тапҡырға — 1,4 миллиондан 40 миллион һумға тиклем арттырылды. 6 миллион һум «Эре тораҡ пункттар» номинацияһында еңеүсегә тапшырыла. Номинацияла еңеүселәргә иһә 5, 4 һәм 3 миллион һум.
