Аҡъяр бассейнына ниндәй исем бирелеүен беләһегеҙме?

Хәтерегеҙҙәме, Аҡъяр бассейнына исем атау буйынса конкурс иғлан ителгәйне. Һөҙөмтәлә, хәйбуллалар ҙур әүҙемлек күрәһтеп, 500-ҙән ашыу вариант тәҡдим итте.

Был турала район хакимиәте башлығы Рөстәм Шәрипов Бәйләнештә төркөмөндәге сәхифәһендә яҙҙы.

--Конкурс комиссияһы “Таналыҡ” тигән исемгә өҫтөнлөк бирҙе. Әйткәндәй, был исемде 25 кеше тәҡдим итте. Исеме ябай, әммә ул был урындың асылын һәм төп тәғәйенләнешен сағылдыра. Тағы ла Хәйбулла районына бәйле булыуы менән дә отошло. Был исемде иң тәүге булып, 18 февралдә 10:19:16 сәғәттә Ғәлим Ғөбәйҙуллин тәҡдим итте.

Конкурс комиссияһы өҫтәмә номинациялар ҙа билдәләне. Шулай итеп:

1. Бассейнға иң үҙенсәлекле исемде, йәғни “Лагуна вайб” вариантын Виктория Хекало тәҡдим итте.
2. 30-ҙан ашыу вариант тәҡдим иткән Зилиә Абзалова конкурстың иң әүҙем ҡатнашыусыһы тип билдәләнде.

Конкурста еңеүселәрҙе ҡотлауҙар бассейнды асыу тантанаһында буласаҡ. Еңеүселәргә иҫтәлекле бүләктәр һәм бассейнға бушлай   айлыҡ абонемент тапшырыла.

https://vk.com/id516529973