+23 °С
Болотло
ЙӘМҒИӘТ
29 Декабрь 2022, 06:41
Радий Хәбиров ЛНР-ҙа Миңлеғәле Шайморатов исемендәге 22-се мәктәптә булды
-
Радий Хәбиров ЛНР-ҙа Миңлеғәле Шайморатов исемендәге 22-се мәктәптә булды
Башҡортостан Башлығы Радий Хәбиров Луганск халыҡ республикаһының Петровское ҡалаһында Рәсәй Геройы, генерал-майор Миңлеғәле Шайморатов исемен йөрөткән 22-се урта мәктәптә булды.
Республика етәксеһе кабинеттарҙы ҡарап сыҡты һәм башҡарылған эштәрҙең яҡшы, сифатлы булыуын билдәләне. Башҡортостан Башлығы уҡытыусылар һәм уҡыусылар менән дә аралашты, уларҙы яҡынлашып килгән яңы йыл байрамдары менән ҡотланы.
– Быйылғы уҡыу йылынан яңыртылған мәктәптә шөғөлләнеүегеҙгә бик шатбыҙ. Был күп йыллыҡ дуҫлығыбыҙ, башҡорт халҡының улы, генерал-майор Миңлеғәле Шайморатов һәм Бөйөк Ватан һуғышында һәләк булған яугирҙәр иҫтәлегенә йылы мөнәсәбәтегеҙ өсөн Башҡортостандан рәхмәт билдәһе. Был беҙҙең өсөн бик әһәмиәтле. Алдығыҙҙа баш эйәм һәм шуның өсөн ҙур рәхмәт! – тине Радий Хәбиров. – Уҡытыусылар коллективы менән тәүгә осрашмайым. Бөгөн балаларға мөрәжәғәт иткем килә. 30 сентябрь һеҙҙең тормошоғоҙҙо ла, йәшәү рәүешегеҙҙе лә үҙгәртте. Хәҙер беҙ һеҙҙең менән бер илдә йәшәйбеҙ. Ошо илдә һеҙҙең оло дуҫығыҙ Башҡортостан бар. Ә Луганск халыҡ республикаһы – беҙҙең яҡын дуҫыбыҙ. Ошо мәлдән беҙ тағы ла яҡынайырбыҙ, бер-беребеҙгә күберәк ярҙам итербеҙ тип уйлайым.
Башҡортостан Луганск халыҡ республикаһының уҡыу йорттары менән үҙ-ара әүҙем эшләргә, тәжрибә уртаҡлашырға, ял иттереү, һауыҡтырыу өсөн балаларҙы һәм үҫмерҙәрҙе ҡабул итергә әҙер, тип билдәләне республика етәксеһе.
– Хөрмәтле уҡытыусылар, беҙ һеҙҙе һәр саҡ көтәбеҙ. Һеҙҙең менән уҡытыу методикаһы менән алмашырға теләйбеҙ, төрлө дисциплиналарҙы уҡытыуҙы ойоштороуҙа булышлыҡ итергә әҙербеҙ. Башҡортостандың Мәғариф һәм фән министрлығына шундай йөкләмә бирелде, – тип билдәләне Радий Хәбиров. – Республикабыҙҙа мәктәп тамамлаусылар өсөн яҡшы вуздар бар. Бынан тыш, былтыр йәй беҙҙә Луганск халыҡ республикаһынан 1,5 мең бала ял итте. Беҙ был эште дауам итергә әҙер – ғаризалар ебәрегеҙ.
Осрашыу һуңында Радий Хәбиров уҡытыусылар коллективын һәм уҡыусыларҙы етеп килгән Яңы йыл менән ҡотланы.
– Беҙ һеҙҙең менән яңы йыл байрамдары алдынан осраштыҡ. Һәр берегеҙгә тыныслыҡ, изгелек, именлек теләйем. Илебеҙ Президенты ҡарарының дөрөҫлөгөнә ныҡлы ышанабыҙ. Күмәкләп бөтә ҡайғыларҙы еңеп сығырбыҙ, – тине Радий Хәбиров.
