Ковидҡа бәйле хәлдәр нисек?

Республиканың Һаулыҡ һаҡлау министрлығы мәғлүмәттәре буйынса, аҙаҡҡы тәүлектә коронавирус 369 ауырыуҙа асыҡланған. Әлеге ваҡытта стационарҙарҙа ковидҡа ҡаршы дауа алыусылар – 245, уларҙың 160-ы – 60 йәште уҙған өләсәй һәм олатайҙар. 13 сирленең хәле ауыр, икәүһе яһалма һулыш аппараты ярҙамында тын ала. Сирҙе сағыштырмаса еңел үткәреп, өйөндә дауаланыусылар – 3 896, шул иҫәптән 1 169-ы – өлкән йәштәгеләр.

Тәүлек эсендә ковидтан 368 яҡташыбыҙ һауыҡҡан. Шөкөр, аҙаҡҡы 24 сәғәттә зәһәр вирустан үлеү осраҡтары теркәлмәгән.

Министрлыҡ шулай уҡ дауахананан тыш пневмонияға ҡағылышлы мәғлүмәттәрҙе лә килтерә: кисәле-бөгөнлө үпкә ялҡынһыныуы диагнозы 12 кешегә ҡуйылған, унан сәләмәтләнеүселәр – 15.

Республикабыҙҙа коронавирусҡа ҡаршы вакцинация әүҙем дауам итә. Әлеге ваҡытта прививканың беренсе компонентын яһатыусылар – 3 348 197 (планда билдәләнгәндең 134,6 проценты). Ике компонентын да алып, вакцинацияны тамамлаусылар – 3 138 407 (126,3 процент). Ревакцинация үтеүселәр – 898 280.