Холера һәм маймыл сәсәге беҙгә янаймы?

Шөкөр, илебеҙҙә һәм Башҡортостанда коронавирусҡа бәйле хәл көндән-көн яҡшыра. Ләкин пандемия, ниһайәт, үтеп китеп бара, тип тыныслана ғына башлағайныҡ, донъяла йәнә ҡурҡыныс инфекциялар – маймыл сәсәге һәм холера таралыу хәүефе хаҡында һүҙ сыҡты.

Был сирҙәрҙең билдәләре, уларҙан һаҡланыу хаҡында бөгөн Башҡортостан юлдаш телеканалының “Сәләм” тапшырыуында республиканың баш санитар табибы Анна Казак һөйләне.

Ул 1 июнгә ҡарата республикала маймыл сәсәге һәм холера йоҡтороу осраҡтары булмауын билдәләне.

Ләкин шулай ҙа һаҡланыу саралары күреү үтә лә мөһим:

– тик ҡайнатылған йәки һауыттарға ҡойоп һатылған һыуҙы ғына эсергә;

– аҙыҡты термик эшкәртергә,

– ҡулдарҙы ентекләп йыуырға, санитария сараларын ҡулланырға;

– сит илдәргә сыҡҡанда мотлаҡ рәүештә һаҡланып, гигиена талаптарын ҡәтғи күҙәтеп йөрөргә.

Фото “Башинформ”дан алынды.