Ирәндек итәгендә баһадирҙар көс һынашты

«Башҡорт аты» халыҡ-ара фестиваленең спорт программаһы бик бай: ат сабышы, «Тай-тулаҡ», «Ауҙарыш», «Ылаҡ»  милли ярыштары ойошторола. Көрәш, грэпплинг,  «Ирәндек мәргәне» уҡ атыусылар бәйгеһе уҙа.  «Бәйге» башҡорт күпбәйгеһе фестивалдең спорт программаһының төп ваҡиғаларының береһе булды.

Бәйгелә Башҡортостан, Мысыр, Һиндостандан килгән ир-егеттәр ҡатнашты. Баһадирҙар суҡмар ырғытыу, таш күтәреү, тарт-эт, тартыш, таш күсереү кеүек ҡатмарлы һәм тамашалы ярыштарҙа көс һынашты. Был дисциплиналарҙың һәр береһе ҡатнашыусыларҙан физик көстө генә түгел, шулай уҡ юғары оҫталыҡ талап итә. Мауыҡтырғыс ярыштар күп тамашасыларҙы үҙенә арбаны.