«Башҡорт аты» фестивалендә «Тәңкә алыу» милли уйыны ойошторола

Башҡортостан вице-премьеры Руслан Хәбибов «Башҡорт аты» халыҡ-ара фестиваленең спорт программаһы менән таныштырҙы. Вице-премьер һүҙҙәренсә, «Башҡорт аты» фестивалендә тәүге тапҡыр «Тәңкә алыу» ярышы уҙғарыла.

«Башҡорт аты» — республикабыҙҙың иң сағыу сараларының береһе. Быйыл фестивалдең спорт программаһын киңәйтергә булдыҡ. Мас-рестлинг һәм грэпплинг, көрәш һәм «Бәйге» башҡорт күпбәйгеһе буйынса турнирҙар үткәрергә әҙерләнәбеҙ. Әлбиттә, беҙҙе уҡ атыусылар өсөн «Ирәндек мәргәне» ярышы, ат сабыштары көтә», — тип билдәләне Руслан Хәбибов.

Шулай уҡ фестивалдә Баймаҡ районының һәм Сибай ҡалаһының ир-егеттәр һәм ҡатын-ҡыҙҙар командалары араһында волейбол буйынса финал уйындарын үткәреү, ГТО нормативтарын үтәү планлаштырыла. Спорт ярыштарынан тыш, программала аттар парады, театрлаштырылған тамаша, кәсептәр күргәҙмәһе, башҡорт эстрадаһы йондоҙҙары концерты бар.

«Башҡорт аты» халыҡ-ара фестивале 6 сентябрҙә Баймаҡ районында ойошторола. Күләмле сара дүртенсе йыл үткәрелә, төп маҡсаты — башҡорт тоҡомло аттарҙы һаҡлау һәм популярлаштырыу.

Автор:Инсаф Хужабиргәнов

Фото:Валерий Шахов