Шахматсылар Хәйбулла ерендә ярышты

15 февралдә Урал Аръяғының 8 командаһы «Башҡортостан шахмат лигаһы» шахмат буйынса республика турнирының һайлап алыу этабына ныҡышмалы көрәш өсөн Хәйбулла ерендә осрашты.

Ярыштарҙы асыу тантанаһында Аҡъяр ауылы Балалар һәм үҫмерҙәр спорт мәктәбе директоры Фидан Нураев, Район мәғариф идаралығы вәкиле Дилә Атанова сәләмләү  һүҙҙәре менән сығыш яһаны. Баш судья һәм «Чемпион» шахмат клубы етәксеһе Айнур Ишмөхәмәтов балаларға уйын ҡағиҙәләре хаҡында иҫкә төшөрҙө. Ҡунаҡтарҙы «Хәйбулла» өлгөлө хореография ансамбле (етәксеһе Юлдаш мортазин) үҙенең бейеүе менән ҡыуандырҙы.

Учалы, Сибай, Баймаҡ ҡалаларынан, Хәйбулла, Йылайыр, Ейәнсура, Әбйәлил, Йылайыр райондарынан 80 шахматсы шахмат мөхитендә яңы форматҡа старт бирҙе. Команда уйынында 10 егет һәм ҡыҙ ҡатнаша.

Сара Башҡортостан Республикаһы Шахмат Федерацияһы кураторлығы аҫтында «Аҡ ладья» шахмат клубы (тренеры Реналь Мәмбәтов) әүҙем булышлығында ойошторола. Клубтың ата-әсәләр комитеты ла ситтә ҡалмай, улар залды әҙерләүгә һәм биҙәүгә әүҙем ҡушыла.

Уйын көсөргәнешле һәм ҡыҙыҡлы була, йәш шахматсылар юғары кимәл, оҫталыҡ һәм командалыҡ рухы күрһәтә. Турнир тамамланғас, еңеүселәр грамоталар һәм миҙалдар менән бүләкләнә.
Төп кубокка Учалы ҡалаһы шахматсылары лайыҡ булды.

Йомғаҡлау һөҙөмтәләре:
1 урын-Учалы ҡалаһы (60 мәрәй);
2 урын-Аҡъяр ауылы Балалар һәм үҫмерҙәр спорт мәктәбе (53,5 мәрәй);
3 урын-Әбйәлил районы (48 мәрәй);
4 урын-Баймаҡ ҡалаһы (43 мәрәй);
5 урын - Ейәнсура районы (25,5 мәрәй);
6 урын - Сибай ҡалаһы (18,5 мәрәй);
7 урын - Йылайыр районы (18 мәрәй);
8 урын - Хәйбулла районы йыйылма командаһы (13,5 мәрәй).