Рәсәй йыйылма командаһы ҡытайҙарҙы 4:1 иҫәбе менән еңде!

Башҡортостан спортсылары V Бөтә донъя күсмә халыҡтар уйындарында тәүге еңеү яуланы. Улар тураһында республиканың спорт министрлығы хәбәр итә.

Ылаҡ (Күк бүре) буйынса Рәсәй йыйылма командаһы Ҡытай йыйылма командаһын 4:1 иҫәбе менән еңде. Ылаҡсылар командаһы составында яҡташыбыҙ, Иҫәнгилде ауылы егете Нур Күсәрбаев сығыш яһай.

Ләйлә Шаһисолтанова мас-рестлингта Италия һәм Монголиянан килгән дәғүәселәрен уңышлы еңеп сыға. Бөгөн финалда ул Ҡырғыҙстан вәкиле менән осраша.

Шулай уҡ финалға Әзербайжан һәм Белоруссия спортсыларынан көслөрәк булған Алена Фәтихова сыға, ә Камилла Зөлҡәрнәева бронза өсөн көрәшә. Алена Пухова һәм Замират Кусаева финалға сыҡты, ярыштар иртәгә үк үтәсәк.

Хәтерегеҙгә төшөрәбеҙ, V бөтә донъя күсмә халыҡтар уйындары уҙған йәкшәмбелә Ҡаҙағстандың баш ҡалаһы Астанала башланды. Ярыштар 13 сентябрҙә тамамлана.  

фото:редакция архивынан.