Эльбрус Ниғмәтуллин «Башҡорт аты» фестивале уның өсөн айырыуса үҙенсәлекле булыуын һөйләне

Башҡорт бәһлеүәне, күп тапҡыр «Рәсәйҙең иң көслө кешеһе» исемен яулаусы, йәмәғәт эшмәкәре Эльбрус Ниғмәтуллин «Башинформ» агентлығына «Башҡорт аты» фестивале уның өсөн айырыуса үҙенсәлекле булыуы хаҡында һөйләне.

– Быйыл фестивалдең тағы ла күләмле үтеренә өмөттәребеҙ ҙур, – тип билдәләне Эльбрус Ниғмәтуллин. – Күп тамашасылар, ҡунаҡтар киләсәк. Хатта бөгөн дә тәүге көн булһа ла, күп ҡунаҡтар килгән. Улар менән бөгөн аралашам, иртәгә тағы ла кеше күп булыр, тигән тойғо бар.

Фестиваль сиктәрендә «Урал-Батыр» халыҡ-ара турниры үтә. Унда Рәсәйҙән һәм сит илдәрҙән көслө кешеләр ҡатнашты.

«Минең өсөн бик тулҡынландырғыс, сөнки бөгөн мин майҙансыҡтарҙың береһен биләйем, бәһлеүәндәр командаһы», – ти спортсы. «Беҙ бөгөн күрһәтмәле сығыштар менән генә килмәнек, иң юғары рейтинглы «Урал батыр» халыҡ-ара турнирын үткәрәбеҙ. Ул минең йыл һайын ойошторған турнирым, ғәҙәттә, сентябрь айында үткәрәм. Быйыл «Башҡорт аты» фестиваленә ҡушылдым. Тамашасылар менән дә, килгән ҡунаҡтар менән дә ыңғай хис-тойғолар ​​менән уртаҡлашырға теләйем, улар бөтә донъянан – Ҡырғыҙстандан, Ҡаҙағстандан килгән батырҙар, Рәсәйҙең иң көслө стронгмендарын, донъя чемпиондарын күрһен өсөн. Шуға ла кәйефем күтәренке. Барыһын да күрмәнем әле, әммә бөгөн төп көн кеүек тойола».

Илдең иң көслө кешеһе һауа торошо пландарҙы тормошҡа ашырыуға аяҡ салмаясағына ышана.

– Артыҡ эҫелек тә бик яҡшы түгел. Миңә хәҙер температура уңайлы кеүек тойола, бигерәк тә спортсылар өсөн. Улар бөтөнләй ҡайғырмай, урамда -30 булһа ла, -10, +10 булһа ла, улар эшләй. Әммә 17-15 градус булһа, кешеләр өсөн иң ҡулай температура. Тамашасылар йылы кейенеп, өшөмәҫкә мөмкин. Мин бындай һауа торошон яратам, ямғыр үткән булһа ла, тиҙ генә ҡояш көнгә йылы бирә.

Эльбрус Ниғмәтуллин да аттарға бәйле бала саҡ хәтирәләре менән уртаҡлашты.

– Беҙҙең ғаиләлә һәр саҡ ат булды. Бала саҡтан ихатала йөрөнөләр, олатайым ат ҡараусы ине, атайым үҙ ҡулдары менән арба эшләне. Тимерсе ине - хатта тәгәрмәстәр, йүгән һәм башҡа кәрәк-яраҡтар эшләй торғайны. Шундай мәлдәр күңелдә уйылып ҡалған: аттар, атай тора, тимерҙән атҡа даға эшләй, шул уҡ ваҡытта малҡайҙың хужаһына ниндәйҙер әкәмәттәр һөйләй. Ул быны бик еңел, тәбиғи һәм ихлас башҡарҙы.

Башҡорт бәһлеүәне шулай уҡ иң ҡыҙыҡлы ваҡиғаларҙы ла иҫенә алды.

«Бер ваҡыт әҙерлекһеҙ атҡа мендем. Миңә 8-9 йәш ине, ул саҡта нисек ултырырға кәрәклеген белмәнем, аттың аяҡ аҫтына йығылып төштөм. Хәҙер хәтерләүемсә, арҡам менән ятҡанмын, ат миңә ҡарап тора. Хатта ҡымшанманы ла. Хайуан минең бала икәнемде аңлаған, ҡурҡмаған, күрәһең. Төрлө осраҡтар булды. Мин уларҙы ашатырға яраттым. Хәтеремдә, әсәйем эштән ҡайта ла, атты ҡоймаға бәйләй торғайны, мин атты ҡул менән ашата инем, бесән бирә инем, ә ул яйлап сәйнәй торғайны. Бер саҡ артыҡ мауығып киттем, ат ҡапыл бармаҡтарымды тешләне. Әлбиттә, бик ҡурҡтым, был ғүмерлеккә хәтерҙә ҡалды.

Автор: Ләйлә Аралбаева