Район спортсылары физкультурниктар көнөн билдәләне

Спортсыларҙы берләштергән байрам Аҡъяр ауылының Балалар һәм үҫмерҙәр спорт мәктәбендә тантаналы асылды.

Сарала ҡатнашыусыларҙы район хакимиәте башлығының социаль мәсьәләләр буйынса урынбаҫары Роза Рәсембәтова, БР велоспорт буйынса Олимпия Резервы спорт мәктәбе директоры Илшат Бикҡолов тәбрикләне.  Улар спорттың төрлө өлкәләрендә республика, ил кимәлендә ҙур ҡаҙаныштар яулап,  районды данлаған спортсыларға рәхмәт белдерҙе.

Күп йыллыҡ намыҫлы хеҙмәттәре өсөн бер төркөм физкультура уҡытыусылары  һәм тренерҙар район хакимиәтенең Рәхмәт хаты менән билдәләнде. Районда физкультура һәм спортты үҫтереүгә индергән тос өлөшө өсөн 1-се Аҡъяр мәкәтәбенең физкультура уҡытыусыһы Әнәс Ҡотоев, спорт мәктәбе тренеры Зөфәр Кәипов, ГТО тестлау муниципаль үҙәге етәксеһе Нургиз Бохарбаев, педагогия хеҙмәте ветераны, РФ атҡаҙанған физкультура хеҙмәткәре Дамир Йәрмөхәмәтов БР Спорт министрлығының Рәхмәт хаты менән бүләкләнде.

Артабан сара футбол, баскетбол, лапта, уҡтан атыу һәм башҡа спорт ярыштары менән дауам итте.