Рәсәйҙең иң көслө кешеһе – Хәйбуллала!

6 тапҡыр «Рәсәйҙең иң көслө кешеһе» бәйгеһендә еңеү яулаған башҡорт бәһлеүәне, пауэрлифтинг һәм армрестлинг буйынса спорт мастеры, 2005 йылдағы «Планетаның иң көслө кешеһе» ярышының вице-чемпионы, йәмәғәт эшмәкәре, актёр Эльбрус Ниғмәтуллин Хәйбулла районына килде. Ул тәү башлап райондың мөһим спорт объекттары - Аҡъярҙағы бассейн, ГТО тапшырыу майҙансығы һәм Балалар һәм үҫмерҙәр спорт мәктәбе менән танышты.

Аҡъяр ауылының Балалар һәм үҫмерҙәр спорт мәктәбендә уҡыусылар өсөн зарядка үтте, уны Рәсәйҙең иң көслө кешеһе Эльбрус Ниғмәтуллин үткәрҙе.

Спортсы уҡыусылар менән иркен аралашып, уңыштарының серҙәре менән уртаҡлашты, ҡыҙыҡһындырған һорауҙарға яуап бирҙе һәм зарядка үткәрҙе, балалар физик күнекмәләр барышында тәнгә йөкләмәне дөрөҫ бүлергә өйрәтте. Бәйгелә ҡатнашыуға Аҡъяр, Сиҙәм, Яңы Ергән, Бүребай ауылдарынан 160 бала килде. Зарядканан һуң балалар билдәле ҡунаҡ менән иҫтәлеккә фотоға төшөргә сиратҡа баҫты.

Һуңынан 2-се Аҡъяр мәктәбендә 5-се кадет класы уҡыусылары һәм 1-се Аҡъяр мәктәбенең йәш спортсылары менән осрашыуҙа ҡатнашты.