Сәләмәт тормошҡа ылыҡтырыуҙың бер юлы

Күҙ алдыңа килтергеҙ, сканворд сискәндә ошондай һорауға юлыҡтың икән: "сәләмәтлек синонимы, өс хәреф". Яуапты таба алаһыңмы? Ярар, ярар, артыҡ аптырамағыҙ, яуап – ГТО булыр. Һуңғы йылдарҙа илебеҙгә спортҡа, сәләмәт йәшәү рәүешенә бермә-бер иғтибар артты. Бигерәк тә йәш быуынды ошо өлкәгә йәлеп итеү буйынса күп эштәр башҡарыла. Шуларҙың береһе  – “Хеҙмәткә һәм оборонаға әҙер” (“ГТО - готов к труду и обороне”) бөтә Рәсәй физкультура-спорт комплексы. Иң мөһиме, ГТО комплексы сәләмәт тормош алып барыуға әйҙәһә, икенсе яҡтан ГТО комплексының отличие билдәһе юғары уҡыу йорттарына ҡабул ителгәндә иҫәпкә алына, йәғни 1-ҙән 10-ға тиклем балл өҫтәү хоҡуғын бирә. Өҫтәүенә, ГТО комплек­сы­ның отличие билдәһенә эйә булған­дарға юғары дәүләт академик стипендияһының тәғәйенләнеүе ихтимал. Ошо арала Аҡъяр ауылы Балалар һәм үҫмерҙәр спорт мәктәбендә 5-се класс уҡыусылары ГТО нормаларын тапшырҙы. Эйе, сәләмәтлекте һатып алып булмай, уны бала саҡтан, йәшлектән хәстәрләргә кәрәк.