Рәсәй һәм Белоруссия биатлонсылары Өфөгә килергә йыйына

Беларусь Республикаһы биатлонсылары 2022 йылдың март-апрель айҙарында Өфөлә һәм Төмәндә үтәсәк Рәсәй Кубогы һәм чемпионаты ярыштарында ҡатнашасаҡ. Ярыштар Өфөлә 12 марттан 16-һына тиклем уҙасаҡ һәм ир-егеттәр һәм ҡатын-ҡыҙҙарҙың алты ярышын үҙ эсенә аласаҡ. Улар - спринт, эҙәрлекләү ярышы һәм ҙур масс-старт. 

Рәсәйҙең ир-егеттәр йыйылмаһы биатлонсылары Юрий Каминский һәм Сергей Башкиров етәкселегендә Өфөлә күнекмәләр үткәрә. 4-10 мартта команда составында Александр Логинов, Эдуард Латипов, Максим Цветков, Василий Томшин, Антон Бабиков, Александр Поварницын, Даниил Серохвостов, Михаил Бурундуков, Илназ Мөхәмәтйәнов әҙерләнә. 8 марттан уларға Кәрим Халили, Михаил Первушин һәм Кирилл Стрельцов ҡушыла.

Ә Рәсәйҙең ҡатын-ҡыҙҙар йыйылмаһы биатлонсылары үҙ төбәктәре командалары составында Рәсәй Кубогы һәм чемпионаты ярыштарына әҙерләнә.

Виктор Майгуров, Рәсәй биатлонсылар союзы президенты:

- Белоруссия спортсыларының Рәсәй Кубогы һәм чемпионаты ярыштарында ҡатнашыуы тураһында ҡарар Белоруссия биатлонсылары федерацияһы рәйесе Андриан Алексеевич Цыбульский менән үҙ-ара килешеү буйынса ҡабул ителде. Беҙ кем менән генә булһа ла конфронтацияға ынтылмайбыҙ, илдәребеҙ спортсыларының мәнфәғәтенән сығып эш итәбеҙ. Белорус биатлонсыларының ҡатнашыуы Өфөлә һәм Төмәндә үтәсәк ярыштарҙың кимәлен күтәрәсәк.

Фото: Рәсәйҙең Биатлонсылар союзы.