Йәштәргә – торлаҡ сертификаттары

Ошо көндәрҙә был категорияға ҡараған йәштәргә торлаҡ сертификаттары тапшырылды. Район хакимиәте башлығы Рөстәм Шәрипов уларҙы ихлас күңелдән ҡотланы һәм торлаҡ менән тәьмин итеү мәсьәләһе власть органдарының иғтибар үҙәгендә, булыуын билдәләне. 

Сертификатҡа эйә булған яҡташыбыҙ Фаяз Дәүләтбаев бөгөн махсус хәрби операция барған биләмәлә лайыҡлы хеҙмәт итеп, ил мәнфәғәтен яҡлай. Нур Ҡолтабәков Красноярск крайының Норильск ҡалаһында уңышлы эшләй. Гөлзада Мәмбәтова иһә Магнитогорск ҡалаһында йәшәй, тормош иптәше менән Алан исемле ул тәрбиәләйҙәр. «Беҙҙең өсөн был бик ҡыуаныслы ваҡиға, Аллаға шөкөр хыялыбыҙ тормошҡа ашты. Торлаҡ алыуҙа ошо сертификат ҙур ярҙам булыр. Район хакимиәтенә оло рәхмәтебеҙҙе белдерәбеҙ», - тине улар.  

• Бөгөнгө көндә бөтәһе 90 граждан торлаҡ алыу өсөн сиратта тора. Уҙған 2025 йылда район хакимиәте тарафынан 13 ҡыҙ һәм егеткә йорт бирелде, шуларҙың дүртәүһенә сертификат тапшырылһа, туғыҙ граждан фатир асҡыстары алып ҡыуанды. Был юлы 3 кешегә сертификат бирҙек һәм быйылғы йылда 8 торлаҡ асҡыстары, шулай уҡ 4 сертификат тапшырыу планлаштырылған. Етем һәм ата-әсә ҡарауынан мәхрүм ҡалған балалар 14 йәштән торлаҡҡа сиратҡа ҡуйыла һәм, бәлиғ булғас, уны алыу хоҡуғына эйә, - тине район хакимиәтенең ҡурсалау һәм балалар хоҡуғын яҡлау бүлеге начальнигы Светлана Пахтусова.

Сертификат алып ҡыуанған йәштәрҙе күңелле мәшәҡәттәр көтә. Уларға яҡты, ҡотло фатирға хужа булып, үҙ усаҡтарында шатланып йәшәргә насип булһын!