Халыҡтан һорау алыу үткәрелә

Махсус өйрәтелгән персонал — интервьюерҙар -  халыҡтан һорау алыу үткәрәсәк һәм яуаптарҙы планшетҡа йәки ҡағыҙ бланктарға теркәйәсәк. Улар һорау алыусыларҙың һүҙҙәренән яҙыласаҡ, раҫлаусы документтар кәрәкмәй. Ҡатнашыусыларға конфиденциаллек һәм анонимлыҡ гарантиялана. Һорау алыу барышында алынған мәғлүмәттәр бер ергә туплана, уның нигеҙендә ярлылыҡ кимәле, ысынбарлыҡтағы аҡса килеме, эш хаҡы, хеҙмәттәрҙең сифаты һәм асыҡлығы, халыҡтың һаулығы буйынса статистик мәғлүмәт формалаша. Һайланма күҙәтеүҙәрҙә һайланма төркөмдән генә һорау алына. Интервьюерҙар һайлап алыуҙы төҙөгәндә алынған адрестар буйынса ғына йөрөй. Яуаптар нигеҙендә йәмғиәт тормошо картинаһы барлыҡҡа килә. Һөҙөмтәләрҙе иҫәпкә алып, мөһим дәүләт ҡарарҙары ҡабул ителә.

Интервьюерҙы мутлашыусынан нисек айырырға?

Интервьюерҙар һәр ваҡыт үҙҙәре менән Росстаттың махсус танытмаһын йөрөтә, унда уның ғәмәлдә булыу ваҡыты күрһәтелгән исеме, фамилияһы, атаһының исеме, вазифаһы, етәксеһенең мисәте һәм ҡултамғаһы була. Ул паспорт менән бергә күрһәтелә.

Интервьюер зәңгәр портфель йәки Росстат логотибы менән ҡара пластик папка тота, планшеты йәки ҡағыҙ бланкылары, Росстат етәксеһенең тикшереү тураһында мәғлүмәтте аныҡларға мөмкин булған телефон номерҙарын күрһәткән хат-мөрәжәғәттәре була. Интервьюер ниндәй тикшереү үткәрелеүе тураһында хәбәр итә һәм уның маҡсаттарын һәм бурыстарын аңлата. Әгәр ул һеҙҙе өйҙә тап итмәһә, почта йәшнигендә белдереү ҡағыҙы ҡалдыра һәм уңайлы ваҡытта уның менән бәйләнешкә инеүҙе тәҡдим итә.

Иң мөһиме: интервьюер бер ҡасан да һеҙҙән аҡса, банк реквизиттары, карта паролдәрен йәки электрон почтағыҙҙы һорамаясаҡ. Бөтә һорау алыуҙар бушлай үткәрелә. Интервьюер бер ниндәй ҙә документтар талап итмәй. Шик тыуғанда Башстаттың территориаль органына +7(347)272-59-08 йәки +7(347)272-65-12 һандарына шылтыратып, мәғлүмәтте аныҡлай алаһығыҙ.

2025-2026 йылдарҙа эшсе көстәрҙе, юғары уҡыу йорттарын һәм колледждарҙы тамамлағандарҙы эшкә урынлаштырыуҙы, мәғлүмәт технологияларын һәм мәғлүмәт-телекоммуникация селтәрҙәрен, шәхси ярҙамсы хужалыҡтарҙың ауыл хужалығы эшмәкәрлеген, халыҡтың килемен һәм социаль программаларҙа ҡатнашыуын тикшереү, шулай уҡ халыҡтың йәшәү шарттарын комплекслы күҙәтеү үткәреләсәк.

Фото: Башстат. 

Мәғлүмәт: https://resbash.ru/news/obshchestvo/2025-10-27/bashstat-poprosit-zhiteley-otvetit-na-voprosy-ob-urovne-ih-zhizni-4442867