"Һайлауҙа ҡатнашмаһам күңелем тыныс булмай"

Аҡъяр ауылында район мәҙәниәт йортонда урынлашҡан 3203-сө һайлау участкаһында халыҡ әүҙем тауыш бирә. Участка асылыу менән бында сират барлыҡҡа килде. Тәүге һайлаусылар араһында мәғариф ветераны Зәкиә Асаинова ла бар ине.

—Һайлауҙа ҡатнашмаһам күңелем тыныс булмай, шуға һәр ваҡыт беренселәрҙән булып тауыш биреү өсөн иртә менән һайлау участкаһына ашығам. Бер һайлауҙы ла ҡалдырғаным юҡ. Донъялар имен булһын, тыныслыҡ урынлашһын. Һайлаған депутаттар халыҡ һәйбәт йәшәһен өсөн бар көсөн һалһындар ине, — тигән теләктәрен еткерҙе данлы уҡытыусылар династияһы вәкиле Зәкиә Нурғәле ҡыҙы.

Хәтерегеҙгә төшөрәбеҙ, 18, 19 һәм 20 сентябрҙә район халҡы Рәсәй Федерацияһы Дәүләт думаһы депутаттарын, шулай уҡ 4-се һайлау округы буйынса Хәйбулла районы Советы депутатын һайлай. Был мәлдә һәр беребеҙ илебеҙҙең киләсәгенә йоғонто яһай ала. Барығыҙҙы ла һайлау участкаларына килергә һәм гражданлыҡ бурысығыҙҙы үтәргә саҡырабыҙ.

Әйткәндәй, районда йәмғеһе 21 меңгә яҡын кеше һайлау хоҡуғына эйә, шуларҙың 400-ҙән ашыуы тәүге тапҡыр тауыш бирәсәк. Оло йәштәгеләр, инвалидтар, ауыр сирле кешеләр, уларҙы ҡараусылар, шулай уҡ башҡа сәбәптәре булғандар өйҙә тауыш бирә ала. Бының өсөн участка һайлау комиссияһына уның эшләгән көндәрендә, шул иҫәптән һуңғы тауыш биреү көнөндә 14:00 сәғәткә тиклем мөрәжәғәт итергә кәрәк. Шунан һуң ғариза биреүсенең өйөнә тауыш биреү өсөн күсмә йәшник менән комиссия ағзалары килә.

Башҡортостанда 18, 19 һәм 20 сентябрҙә һайлау барышында «Рәхмәт» традицион акцияһы үткәрелә.  Һайлау участкаһына килгәндәргә купондар тапшырыла.    Был юлы ташламалар ғына була: бер ниндәй ҙә бүләктәр уйнатылмай.   Купонды теркәргә кәрәкмәй. Унда акцияның сайтына (рахмат2026.рф) күсеү өсөн QR-код урынлаштырылған, сайтта партнерҙарҙың тулы исемлеге һәм акцияның шарттары менән танышырға мөмкин. Хәйбулла районындағы партнерҙар - һүрәттә. Бер ҡайҙа ла исем-шәрифте, паспорт мәғлүмәттәрен, телефон номерҙы яҙырға кәрәкмәй. Әгәр һеҙгә кемдер шылтыратып, үҙен акцияны ойоштороусы тип таныштырһа, ниндәйҙер мәғлүмәттәр, СМС-кодтар һораһа, бер нәмә лә әйтмәгеҙ. Ойоштороусылар әйтеүенсә, әгәр купонды алмаһалар, уны ҡабаттан ҡулланырға мөмкин. Ташлама ошо ҡағыҙ купонды күрһәткән осраҡта бирелә.