Владимир Путин Рөстәм Нәбиевты Рәсәйҙең Йәмәғәт палатаһы составына индерҙе

Параспортсы, блогер һәм Башҡортостан Башлығы ҡарамағындағы Кеше хоҡуҡтары һәм граждандар йәмғиәте институттарын үҫтереү советы ағзаһы Рөстәм Нәбиев Рәсәйҙең Йәмәғәт палатаһы составына инде. Состав Рәсәй президенты Владимир Путин указы менән раҫланған.

Рәсәйҙең Йәмәғәт палатаһы составына шулай уҡ йырсы Диана Гурцкая, яҙыусылар Армен Гаспарян һәм Сергей Лукьяненко, скрипкасы Пётр Лундстрем, ГИТИС ректоры Григорий Заславский, генераль директор урынбаҫары, Бөтә Рәсәй дәүләт телерадиокомпанияһының төбәк департаменты етәксеһе Рифат Сабитов, «Вести» яңылыҡтар программаһын алып барыусы Мария Ситтель һәм башҡалар инде.

Указ ҡул ҡуйылған көндән ғәмәлдә.

Рөстәм Нәбиев инвалидтар эштәре буйынса координация советы ултырышында үҙенең өлгөһө менән төрлө йәрәхәттәр алған кешеләрҙе дәртләндерергә  тырышыуы хаҡында һөйләгәйне.