Кем киләсәк тураһында уйлай, шул кадрҙар үҫтерә

22-23 ғинуарҙа Рәсәй Геройы М. Серафимов исемендәге “Патриот” хәрби-патриотик паркы майҙансығында йәш дәүләт һәм муниципаль хеҙмәткәрҙәренең II республика “ГосСтарт. Башҡортостан” форумы үтте. Бындай форматтағы беренсе форум иһә 2024 йылдың октябрендә ойошторолғайны.

Сара Башҡортостандың 35 йәшкә тиклемге йәш дәүләт хеҙмәткәрҙәренең профессиональ һәм универсаль компетенцияларын үҫтереүгә йүнәлтелгән һәм кәм тигәндә 260 ҡатнашыусыны берләштерҙе. Форумда дәүләт һәм муниципаль хеҙмәт өлкәһендәге төп төбәк һәм федераль проекттарҙың презентацияһы үтте, шулай уҡ ғәмәлдәге власть органдары етәкселәре йәштәр менән тәжрибә уртаҡлашты.

Форум йәш дәүләт һәм муниципаль хеҙмәткәрҙәргә ярҙам итеүгә һәм һөнәри үҫешкә, кадрҙар резервын булдырыуға һәм йәмәғәт идаралығы системаһында кадрҙарҙың тотороҡлолоғон арттырыуға йүнәлтелгән. Дәүләт хеҙмәтенең ролен, төбәк һәм ил үҫешенең көнүҙәк саҡырыуҙарын аңлауға, шулай уҡ ғәмәлдәге идарасылар һәм эксперттар менән практик тәжрибә уртаҡлашыуға айырыуса иғтибар бүленә.

Форумдың маҡсаты ҙур һәм әһәмиәтле. Уларҙың бер нисәһе хаҡында түбәндә һөйләйбеҙ. 

Башҡортостандың кадрҙар потенциалын формалаштырыу

Башҡортостан Башлығы Радий Хәбиров етәкселегендә дәүләт һәм муниципаль хеҙмәттең кадрҙар потенциалын яңыртыу һәм нығытыу буйынса эҙмә-эҙлекле эш алып барыла. Айырыуса иғтибар йәш белгестәргә һәм тыныс тормошҡа әйләнеп ҡайтҡан махсус хәрби операцияла ҡатнашыусыларға бүленә. Был категория артабан уҡытыу, идара итеү әҙерлеге һәм профессиональ үҫеш менән перспективалы кадрҙар резервы булараҡ ҡарала. Муниципаль хеҙмәткәрҙәр урындарҙа дәүләт сәйәсәтен тормошҡа ашырыуҙа төп роль уйнай. Тап халыҡ менән туранан-тура бәйләнеш кимәлендә власть ҡарарҙары аныҡ йөкмәткегә эйә була һәм кешеләрҙең яҙмышына йоғонто яһай. “Урында, ерҙә” эшләү властарға ышанысты формалаштыра һәм граждандарҙың һорауҙарына оператив яуап бирергә мөмкинлек бирә. Кадрҙарҙы яңыртыу һәм бюрократик инерциянан баш тартыу властың һөҙөмтәлелеген арттырыуҙың төп шарты тип ҡарала.

Радий Хәбиров йәш дәүләт хеҙмәткәрҙәре менән шәхси тәжрибәһен уртаҡлаша

Идара итеү системаһында карьера дауамында өйрәнергә, төплө ҡарарҙар ҡабул итергә һәм яңы шарттарға яраҡлашырға һәләтле белгестәр талап ителә. Остазлыҡ һәм тәжрибә тапшырыу, шулай уҡ кешеләр менән эшләү һәм уларҙы ишетеү һәләте мөһим роль уйнай. Башҡортостанда төбәк етәкселегенең йәштәр лидерҙары менән үҙ-ара даими эш итеүенең системалы практикаһы төҙөлгән. Башҡортостан Башлығы Радий Хәбиров даими нигеҙҙә йәштәр берләшмәһе вәкилдәре менән осрашыуҙар үткәрә, улар барышында көнүҙәк мәсьәләләр һәм проблемалар тикшерелә. Бындай осрашыуҙар йомғаҡтары буйынса ҡайһы бер мәсьәләләр профилле ведомстволар кимәлендә хәл ителә, айырым темалар төбәк етәксеһенең шәхси контроленә алына. Башҡортостан Башлығының ҙур сәйәси һәм идара итеү тәжрибәһе йәштәр менән йөкмәткеле һәм ышаныслы диалог төҙөргә, шулай уҡ практик белемдәр һәм тормош тәжрибәһе менән уртаҡлашырға мөмкинлек бирә.

Башҡортостан – йәштәрҙе үҫтереү өсөн мөмкинлектәр төбәге

Башҡортостан иҡтисадты, юғары технологиялы тармаҡтарҙы, креатив индустрияларҙы, мәғарифты, мәҙәниәтте һәм спортты үҫтереп, төп социаль-иҡтисади йүнәлештәр буйынса алдынғы урындарҙы биләй. Республика эҙмә-эҙлекле рәүештә йәштәргә, инфраструктураға һәм диалог майҙансыҡтарына, шул иҫәптән форумдарға, мәғариф программаларына һәм федераль проекттарға инвестициялар һала. Ҡатмарлы иҡтисади шарттарға ҡарамаҫтан, йәштәр сәйәсәтен яҡлау өҫтөнлөклө булып ҡала. 2025 йылда республикала йәштәр менән эшләү буйынса белгестәрҙе, педагогтарҙы һәм психологтарҙы уҡытыу буйынса комплекслы система булдырылды.

Йәштәр сәйәсәте - төбәк үҫешенең мөһим өҫтөнлөгө

Республика йәштәр һаны буйынса Волга буйы федераль округында беренсе һәм Рәсәйҙә етенсе урынды биләй – бер миллиондан ашыу кеше. Төбәктә Росмолодежь линияһы буйынса проекттар эҙмә-эҙлекле тормошҡа ашырыла, шулай уҡ заманса инфраструктура үҫешә: аралашыу, үҙ-үҙеңде тормошҡа ашырыу һәм проект эшмәкәрлеге өсөн йәштәр үҙәктәре һәм киңлектәр булдырыла. Йәштәр менән эшләүгә системалы ҡараш һәм инфраструктураның юғары үҫеш кимәле федераль етәкселек тарафынан ыңғай баһа ала, был тормошҡа ашырылған сәйәсәттең тотороҡлолоғон һәм һөҙөмтәлелеген раҫлай.

Тимур ВӘЛИТОВ, Йәмәғәт палатаһы ағзаһы, политолог:

– Башҡортостан Башлығы Радий Хәбиров республикаға етәксе булып эш башлауы менән, үҙ эшмәкәрлегенең төп йүнәлештәренең береһе тип йәштәр менән әүҙем эшләүҙе билдәләне. Быны дәлилләгән миҫалдар күп: “Йәшлек Хаус” төҙөлдө, дәүләт комитеты Йәштәр сәйәсәте министрлығына әйләнде. Радий Хәбиров беҙҙең студенттар республикала ҡалһын, лайыҡлы белем алһын өсөн ҙур, заманса кампус төҙөлөшөн башланы. “Патриот” паркында даими рәүештә йәштәр менән тиңдәрсә осраша. Бының менән республика етәксеһе йәштәрҙең киләсәгенә битараф булмауын күрһәтә. Һәм үҙенең эшендә йәш кадрҙарға таяна. Уларҙы иһә һөҙөмтәле йәштәр сәйәсәте ярҙамында үҫтерә. Бында “кадрҙар барыһын да хәл итә” тигән матур һүҙҙәр иҫкә төшә. Кем киләсәк тураһында уйлай, ул кадрҙар үҫтерә. Әлеге форум да ошо эштәрҙең ҙур һөҙөмтәһе булып тора.

Фото: Башҡортостан Башлығы сайты.