Берҙәмлектең сағыу сағылышы

Бөгөн беҙ, бер төркөм ҡәҙерле ауылдаштар, Башҡортостан Республикаһы көнөнә арналған автоуҙыш менән үттек. "Айыҡ ауыл” конкурсы сиктәрендәге был сара беҙҙең өсөн ябай ғына сәйәхәт түгел ине. Ул — тыуған еребеҙгә, уның тарихына, мәҙәниәтенә, телебеҙгә, ғөрөф-ғәҙәттәребеҙгә һәм бөтә халҡына булған ихтирамыбыҙҙың, һөйөүебеҙҙең асыҡ сағылышы. Автомобилдәр колоннаһы юлға сыҡҡанда, һәр машинала флагтар елберләне, һәр йөрәктә ғорурлыҡ тойғоһо уянды. Беҙ бер ғаилә кеүек бергә барҙыҡ: кемдер үҙенең тыуған ауылын, кемдер бала саҡ хәтирәләре ҡалған урындарын күрергә ынтылды. Ләкин барыбыҙҙы ла бер нәмә берләштерҙе — Башҡортостанға, тыуған ауылыбыҙға һөйөү.

Юлыбыҙ мәҙәниәт йорто алдынан башланып, ауылыбыҙҙың урамдары аша үттек. Юл буйында беҙҙе ауылдаштар йылы ҡаршы алдылар. Ауылдарҙа балалар ҡул болғап сәләмләне, ололар изге теләктәрен еткерҙе, йәштәр фотоға төштө.

Автоуҙышта һәр водитель үҙ машинаһының ышаныслы булыуына инанды. Колонна берҙәм ритмда барҙы: бер уҡ аралыҡты һаҡланыҡ. Был юлда беҙ яңы дуҫтар таптыҡ, иҫке дуҫлыҡтарҙы нығыттыҡ. Автоуҙыш — ул тик машиналар түгел, ә кешеләр, уларҙың йөрәктәре, маҡсаттары берләшкән хәрәкәт.

Башҡортостан Республикаһы көнө — ул бөтә был байлыҡты, берҙәмлекте, дәүләтселегебеҙҙең ныҡлығын билдәләгән көн. 1990 йылдың 11 октябрендә республика үҙенең дәүләт суверенитеты тураһында декларация ҡабул итте. Ошо көндән башлап беҙ үҙ юлыбыҙҙы, үҙ киләсәгебеҙҙе төҙөй башланыҡ. Бөгөн беҙ был тарихи көндө автопробег менән билдәләп, үткәнебеҙҙе хөрмәт итәбеҙ, бөгөнгөбөҙҙө ҡәҙерләйбеҙ һәм киләсәгебеҙгә ышанабыҙ.

Йәнтеш ауылы барыһы ла бер үк теләктәр менән йәшәй: тыныслыҡ, именлек, имен тормош, балаларға бәхет. Автоуҙыш ошо берҙәмлекте тағы бер ҡат нығытты. Бер колоннала барған машиналар кеүек, беҙ ҙә бер маҡсатҡа — республикабыҙҙың сәскә атыуына, халҡыбыҙҙың именлегенә — берләшәбеҙ. Беҙҙең көс — берҙәмлектә, татыулыҡта, бер-беребеҙҙе аңлауҙа.

Был автоуҙыш беҙҙең өсөн онотолмаҫлыҡ хәтирә булып ҡалды. Йөрәгебеҙҙә йылы эҙ ҡалдырҙы. Беҙ арып ҡайтманыҡ, ә киреһенсә — рухланып, көс йыйып, яңы эштәргә әҙер булып ҡайттыҡ. Сөнки тыуған ерҙең матурлығын, халҡының ихласлығын күреү үҙе үк ҙур бәхет. Башҡортостан — беҙҙең уртаҡ йортообоҙ. Уның именлеге, сәскә атыуы беҙҙең һәр беребеҙҙең ҡулдарында. Беҙ уны һаҡларға, үҫтерергә, байытырға тейешбеҙ.

Башҡортостан Республикаһы көнө менән, ҡәҙерле ауылдаштар! Барлыҡ халҡыбыҙҙы, республикабыҙҙа йәшәгән һәр кешене, милләтенә, теленә, диненә ҡарамаҫтан, ошо изге байрам менән ихлас ҡотлайбыҙ! Һеҙгә ныҡлы һаулыҡ, бәхет, именлек, ғаиләләрегеҙгә тыныслыҡ, эштәрегеҙгә уңыштар теләйбеҙ. Юлдарығыҙ яҡты, күңелдәрегеҙ йылы, йорттарығыҙ тулы булһын. Берҙәмлегебеҙ нығый барһын, телдәребеҙ, ғөрөф-ғәҙәттәребеҙ һаҡланһын, киләсәк быуынға еткерелһен. Тыуған Башҡортостаныбыҙ сәскә атһын, илебеҙ тыныс, күгебеҙ аяҙ булһын!