Күңелендә мәңгегә моряк булып ҡалған

Һәр кем һыу аҫты кәмәһендә хеҙмәт итә алмай. Һаулыҡ, физик әҙерлек һәм, әлбиттә, сикләнгән арауыҡтан ҡурҡмау талап ителә. Башҡортостан – диңгеҙҙәрҙән алыҫ урынлашһа ла, бик күп офицер, мичман, флот ветерандарының төйәге. Нисәмә быуын вәкиле илебеҙҙең хәрби-диңгеҙ флотында намыҫлы хеҙмәт юлы үткән. Ғәлиәхмәт ауылында йәшәүсе Мәүлит Миңлешев та бынан 50 йыл элек Төньяҡ флотта һыу аҫты кәмәһендә хеҙмәт итә.

Мәүлит Искәндәр улы 1952 йылда Аҡъюл ауылында донъяға килә. Ғәлиәхмәт мәктәбендә 10-сы класты тамамлағас, бер йыл колхозда эшләй. 1971 йылдың май айында армияға алына.

- Армияға алынғас, “Кронштадт” һыу аҫты кәмәһенә эләктем. 8 ай һыу аҫты йөҙөүе уҡыу отрядында булдым. Артабан Мурманск өлкәһе Гаджиево ҡалаһында урынлашҡан Төньяҡ флотының базаһында радиация хәүефһеҙлеге хеҙмәте дозиметрисы булып хеҙмәт иттем. Һыу аҫты кәмәләрендә радиацион контроль алып барҙыҡ. Ул замандарҙа ҡайҙа хеҙмәт итеүебеҙҙе әйтергә ҡушманылар. 3 йыл хәрби бурысымды үтәп, 1974 йылда тыуған яҡҡа ҡайттым. Флотта хеҙмәт иткән йылдар йәшлектең матур бер мәле булып хәтерҙә ҡалған,  - тип флотта хеҙмәт иткән йылдарын хәтергә алды  Мәүлит Миңлешев.

Һыу аҫты кәмәһендә өс йыл хеҙмәт итеү Мәүлит Искәндәр улына ҙур сынығыу бирә. Ул донъя күреп, диңгеҙ гиҙеп, ысын ир-егеттәр мәктәбен үтеп ҡайта.  Хеҙмәтен тултырып тыуған яҡҡа ҡайтҡас, “Салауат” колхозында агроном булып  эшләй. Сибайҙа ауыл хужалығы техникумын, Өфөлә Башҡортостан ауыл хужалығы институтын тамамлай. Колхоз тарҡалғас, урман хужалығында, ауыл биләмәһе хакимиәтендә эшләп хаҡлы ялға сыға. Әле урындағы ветерандар советы рәйесе булып тора. Ҡатыны Рәшиҙә Бикмырҙа ҡыҙы менән 49 йыл татыу ғүмер кисерәләр, 4 бала тәрбиәләп үҫтергәндәр. Бөгөн улар 8 ейән-ейәнсәргә бәхетле ҡартатай һәм өләсәй. Татыу ғаилә мал-тыуар аҫрап, баҡса үҫтереп, матур донъя көтәләр.

- Диңгеҙҙә көсһөҙ кешеләр була алмай, улар бөтә шәхси сифаттарын аса, характерҙарын сыныҡтыра, дисциплинаға өйрәнә. Шуға күрә флотта хеҙмәт итеү - иң ҡатмарлы һәм абруйлыларҙың береһе һанала. Беҙҙең заманда армияла хеҙмәт итмәү хурлыҡ булды. Йәше еткән һәр бер егет Ватан алдындағы үҙ бурысын лайыҡлы үтәне. Беҙ хеҙмәт иткән осорҙа тәртип шул тиклем көслө булды. Әле хәрби частарҙа шундай тәртип урынлаштырһалар яҡшы булыр ине, - тигән фекерҙә элекке моряк.

Мәүлит Искәндәр улын һәм барлыҡ һыу аҫты кәмәһендә хеҙмәт итеүселәрҙе байрамдары менән ҡотлайбыҙ һәм иҫәнлек-һаулыҡ теләп ҡалабыҙ.