Өфө вуз-ара кампусы ғилми ҡунаҡханаһына саҡыра

6 февралдә, Рәсәй фәне көнө алдынан, Евразия ғилми-белем биреү үҙәгенең ғилми ҡунаҡханаһы йәнә юғары уҡыу йорттары студенттары кампусында үҙ ишектәрен аса. Уның эшенә ярашлы, ҡатнашыусыларҙы профессиональ диалог өсөн бай программа: китаптың исем туйы, ғилми стендап, ғалимдар өсөн асыҡ микрофон көтә. Вуз-ара кампус лабораториялары ғалимдары фәнде үҫтереүҙең өҫтөнлөклө йүнәлештәре, шулай уҡ үҙҙәренең асыштары хаҡында һөйләйәсәк. Сара Рәсәй Федерацияһында Фән һәм технологиялар ун йыллығы башланғысын тормошҡа ашырыу планына ярашлы ойошторола.

– Фән диалогтан башлана. Беҙҙең төбәктә был диалогтың лаборатория стенаһынан сығыуына һәм кампустағы Ғилми ҡунаҡхана кеүек заманса, йәнле формалар алыуына бик шатмын. Был арауыҡта йәш тикшеренеүселәр үҙҙәренең эшләнмәләре менән таныштырыуҙан тыш, уларҙың ысынбарлыҡтағы ҡиммәтен дә күрә, фәнни берләшмәнән кире бәйләнеш ала. Тап ошонда, дисциплиналар һәм идеялар тоташҡан урында, киләсәктә төбәгебеҙҙең технологик йөҙөн билдәләйәсәк алдынғы проекттар тыуырына ышанам. Һәммәһен дә ҡатнашырға саҡырам! - тип билдәләне Башҡортостандың Фән һәм юғары белем биреү буйынса дәүләт комитеты рәйесе Светлана Мостафина.

Сарала ҡатнашыуға вуз-ара студенттар кампусы тикшеренеүселәре, шулай уҡ Башҡортостандың алдынғы юғары уҡыу йорттары эксперттары саҡырылған. Хәтерегеҙгә төшөрәбеҙ, тәүге тапҡыр Ғилми ҡунаҡхана «Фән айлығы» сиктәрендә уңышлы эшләй башланы.

Белешмә өсөн:

Рәсәй Президенты Владимир Путиндың ҡушыуы буйынса илдә заманса кампустар селтәре булдырыла. 2030 йылға 25 кампус барлыҡҡа килергә тейеш. Эште Рәсәй Федерацияһы Хөкүмәте һәм Рәсәй Мәғариф һәм фән министрлығы алып бара. Әлеге ваҡытта «Йәштәр һәм балалар» милли проекты ярҙамында 24 кампус проектлана һәм төҙөлә. 2036 йылға кампустар һаны 40-ҡа етәсәк.

Өфө вуз-ара кампусы – ул 4,3 мең кешегә иҫәпләнгән торлаҡ биналары, уҡыу фәнни комплексы, лабораториялар, эшлекле зоналар, магазиндар, скверҙар һәм башҡа төрлө уңайлы ҡала мөхите объекттары булған студенттар киңлеге.

Фото һәм сығанаҡ: pravitelstvorb.ru

Беҙҙең МАХ каналына https://max.ru/gazetabashkortostan ҡушылығыҙ!