Тимурға имен юлдар теләйбеҙ

Тантаналы шарттарҙа Хәйбулла районының «Рәсәй эше» кадрҙар үҙәгендә махсус хәрби операция ветераны Тимур Дәүләтбаевҡа махсус сертификат тапшырылды. Был документ ҡул ярҙамында йөрөтөү ҡорамалы менән йыһазландырылған автомобиль менән идара итеү хоҡуғын раҫлай.

 «Ватанды һаҡлаусылар» фонды һәм ДОСААФ махсус хәрби операцияла ҡатнашыусыларға ярҙам программаһын тормошҡа ашыра. Уның ярҙамында хәрби хәрәкәттәр ветерандары кәрәкле ҡорамалдар менән йыһазландырылған махсус транспорт сараһы менән идара итеүгә бушлай сертификат ала ала.

ДОСААФ-тың Шишмә районы бүлексәһе Хәйбулланың кадрҙар үҙәге  менән берлектә «Тима» позывнойлы яугирға уҡытыу курсын уңышлы үтергә ярҙам итә. ДОСААФ-тың Шишмә районы бүлексәһе рәйесе Филүс Сәхипгәрәев яугирҙы үҙгәртеп ҡоролған автомобилдә йөрөү нескәлектәренә өйрәтеүгә тәғәйенләнгән махсус автомобилдә килә. Филүс Фәнил улы үҙе лә хәрби хәрәкәттәр ветераны, һуғыш ауырлыҡтарын үҙ иңендә татыған уҙаман. Ул һаулығын һәм ғүмерен ҡурҡыныс аҫтына ҡуйып, ил мәнфәғәттәрен яҡлаусыларға ярҙам итеүҙе үҙенең бурысы тип һанай. Уның һүҙҙәренсә, Тимур - был автомәктәп хеҙмәттәренән файҙаланған 15-се кеше. Бөгөнгө көндә был республикала хәрби хәрәкәттәр ветерандары һәм һаулыҡ мөмкинлектәре сикләнгән кешеләр ҡул менән идара итеүсе автомобиль менән идара итеүгә ҡайтанан әҙерлек курстары үтә алған берҙән-бер учреждение. «Беҙ үҙебеҙҙекеләрҙе ташламайбыҙ. Киләсәктә тик ҡул ярҙамында ғына йөрөтөлгән заманса йөк автомобилдәрен һатып алыу планлаштырыла, шулай итеп мөмкинлектәре сикләнгәндәрҙең перспективалары арта», — тип билдәләй ойошма етәксеһе.

Тимур Дәүләтбаев Атингән ауылында тыуып үҫә. 2022 йылдың сентябрь айында өлөшләтә мобилизация сиктәрендә МХО биләмәһенә юллана. Донецк һәм Луганск фронттарында яу юлын үтә. Алыштарҙың береһендә Тимур ҡаты яралана, ике аяғын да юғалта, оҙаҡ ваҡыт госпиталдә дауаланғандан һуң демобилизациялана. Әммә йәш һалдат өмөтһөҙлөккә бирелмәй, ваҡыт ауырлыҡтары алдында ҡулдарын төшөрөргә күнекмәгән. Яугир башҡа яугирҙарға ла төшөнкөлөккә бирелмәҫкә кәңәш итә. Район етәкселәренә, «Ватанды Һаҡлаусылар» фондына һәм гуманитар ылауҙар йыйған, селтәрҙәр үргәндәрҙең барыһына ла оло рәхмәттәрен белдерҙе. Күп ваҡыт үткәндән һуң, оҙаҡламай йәнә автомобиль руле артына ултырып, урамдар буйлап йөрөй алыуы МХО ветеранына шатлыҡ өҫтәй. Шуҡ егет тиҙ арала ҡул ярҙамында йөрөтөлгән автомобиль менән идара итеүҙе үҙләштерә. Үҙ аллы йөрөтөү хәрәкәт итеү проблемаларын хәл итеүҙән тыш, элекке һалдат алдында ҙур мөмкинлектәр аса.

Хәйбулла районының «Рәсәй эше» кадрҙар үҙәге етәксеһе Азамат Дәүләтбаев һүҙҙәренсә, махсус хәрби операцияла ҡатнашыусылар һәм уларҙың ғаилә ағзалары өсөн ярҙам саралары ҙур популярлыҡ менән файҙалана. Уларға ғаризалар килә башланы ла инде. Уларҙың ҡайһыларын хәрбиҙәр үҙҙәре, икенселәрен ғаиләләре алып килә. Күптәр яңы һөнәрҙе үҙләштерергә теләй. Яңы һөнәрҙәр уларға эш табырға һәм йәшәү сифатын яҡшыртырға булышлыҡ итәсәк. Был хәрбиҙәргә һәм уларҙың яҡындарына ауырлыҡтарҙы еңеп сығырға ярҙам итә.

Ветеранды район хакимиәте башлығы исеменән эштәр идарасыһы Салауат Байсурин ҡотланы. Ул ветеранды руль артына ҡайтыуы менән тәбрикләп, район етәкселегенең махсус хәрби операцияла ҡатнашыусыларға һәр башланғыстарҙа ярҙам күрһәтергә әҙер булыуын һыҙыҡ өҫтөнә алды. "Беҙҙең яҡташыбыҙ - ауырлыҡтар алдында бөгөлмәгән, сыҙамлыҡ һәм тормош һөйөү өлгөһө булған ысын ир-егеттәрҙең береһе, беҙ уға ышанабыҙ», - тине ул.

Ҡулда кәрәкле сетрификат бар, Тимурҙы артабан машина һайлау кеүек күңелле мәшәҡәттәр көтә.