Мотоциклдағы ир ҙә, йәйәүле ҡатын да һәләк булды...

Республиканың Дәүләт автоинспекцияһы мәғлүмәттәре буйынса, бөгөн иртәнсәк Салауат ҡалаһында Островский һәм Космонавтар урамдары киҫелешендә 27 йәшлек “Ямаха” мотоциклы водителе светофорҙың тыйыу сигналына сыға һәм “Форд Максус” автомобиле менән бәрелешә.

Ирҙең ике тәгәрмәсле транспорт менән идара итеү хоҡуғын биргән категорияһы булмауы билдәле. Авария һөҙөмтәһендә мотоциклсы ашығыс медицина ярҙамы килгәнсе вафат була.

Тағы ла бер юл фажиғәһе бөгөн иртәнге 11 сәғәт тирәһендә Өфө районының Николаевка ауылында теркәлгән.‎ Яҡынса мәғлүмәттәр буйынса, 31 йәшлек водитель “Лада Ларгус”  автомобиле менән көйләнмәгән йәйәүлеләр үткәүеле аша сығып барған 71 йәшлек ҡатынды бәрҙергән. Юл-транспорт ваҡиғаһы һөҙөмтәһендә пенсионер медицина учреждениеһына алып барылғанда алған йәрәхәттәренән вафат була.

Һәр кеше юл хәрәкәте ҡағиҙәләрен теүәл үтәһә, бындай фажиғәле хәлдәр булмаҫ ине. Үҙегеҙҙе һәм яҡындарығыҙҙы һаҡлағыҙ, ғүмер бер генә бирелә.

Фото: республиканың дәүләт автоинспекцияһы.