Ура! Бәпес тыуҙы!

Билдәле яҡташыбыҙ, блогер Рөстәм Нәбиевты күптәр социаль селтәрҙәр аша күҙәтеп бара. Казарма емерелеп аяҡтарын юғалтһа ла, күптәргә көслө рух өлгөһө булған Рөстәмдең ике ҡыҙы – Сафия менән Әминә бар. Уларҙың ҡатыны Индира менән өсөнсөгә бәпес көткәнен күптәр белә ине.

Һәм бөгөн төндә Нәбиевтар ғаиләһендә ҡыуаныслы ваҡиға булды: уларҙың өсөнсө бәпестәре донъяға килде. Әйткәндәй, үҙҙәренең кеме тыуырын Рөстәм менән Индира белмәй ине – улар табиптарҙан быны махсус рәүештә әйтмәүҙе һораны. Йыш ҡына: “Кем тыуһа ла тыуһын, тик иҫән-һау булһын” ти ине Нәбиевтар. Шулай ҙа Рөстәмдең яҙылыусылары уға "ике ҡыҙҙан һуң малай кәрәк" тип йыш яҙҙы.

Йәш ата-әсә үҙенә килһен дә, яңылыҡтарын әйтер. Әлегә уларға ныҡлы һаулыҡ, тыныс төндәр теләйбеҙ. Төклө аяғың менән, сабый!

Фото: Рөстәм Нәбиевтың социаль селтәрҙәге сәхифәһенән.