Йәштәр – беҙҙең киләсәк

Башҡортостан Республикаһында йәштәр сәйәсәте тормошҡа ашырылған граждандар һаны 1,057 млн кеше тәшкил итә (төбәк халҡының дөйөм һанынан 26%). Был күрһәткес буйынса республика Волга буйы федераль округында алдынғылыҡты биләй һәм Рәсәй федерацияһы субъекттары араһында 7-се урынды биләй.

2024 йылда йәштәр эштәре буйынса федераль агентлыҡ форум кампанияһын һәм бөтә Рәсәй йәштәр проекттары конкурсын уҙғарыу йомғаҡтары буйынса Башҡортостан Республикаһы йәштәре 78 миллион һумдан ашыу суммаға 143 грант отто. Йәштәр йәлеп иткән грант средстволары күләме буйынса Башҡортостан Республикаһы Рәсәй төбәктәре араһында 5-се һәм Волга буйы федераль округы төбәктәре араһында 2-се урын алды.

Йәштәр учреждениеларын яңыртыу

2024 йылда республикала «Йәшлек.Регион" йәштәр учреждениеларын ремонтлау буйынса төбәк программаһын тормошҡа ашырыу дауам итте һәм йыл йомғаҡтары буйынса ошо программа сиктәрендә 5 яңы йәштәр киңлеге эшләй: баш ҡалала “Орбита" йәштәр үҙәге һәм Күмертау, Ағиҙел, Краснокама һәм Хәйбулла райондарында профилле учреждениелар. Хәбәрҙар булыуығыҙса, ошо төбәк программаһы ярҙамында район үҙәгендә Йәштәр йорто асылды.

Был эштә мөһим өҫтөнлөк – гражданлыҡ-патриотик тулыланған заманса йәштәр киңлектәрен булдырыу, унда йәштәр файҙалы ял итә, ыңғай ваҡиғаларға йәлеп ителә һәм үҙҙәренең үҫеш траекторияһын формалаштыра ала.

2024 йылдан төрлө мөхиттәге йәштәр вәкилдәре өсөн системалы нигеҙҙә республика Башлығы менән тематик осрашыуҙар үткәрелә, улар мәғариф-ағартыу программаһы менән оҙатыла.

Былтыр блогерҙар, ирекмәндәр, студенттар, дәүләт хеҙмәткәрҙәре, эшләүсе йәштәр, 2025 йылда эшҡыуарҙар, студенттар һәм аграрийҙар менән осрашыуҙар үткәрелде.

“Йәштәр менән эшләү - беҙҙең өсөн төп бурыс. Беҙ ҡасандыр был вазифаларыбыҙан китәсәкбеҙ, унан һуң йәш кешеләр киләсәк, улар аңлы рәүештә, тормошта үҙҙәрен дәүләткә, шәхескә ҡарата дөрөҫ позициялаштырыу менән килергә тейеш”, - тип белдерҙе Башҡортостан Башлығы Радий Хәбиров.

Йәштәр беҙҙең киләсәгебеҙ генә түгел, йәштәр – беҙҙең бөгөнгөбөҙ ҙә. Сөнки тап йәштәр йәмғиәтебеҙҙең иң әүҙем, инициативалы өлөшө. Улар заман менән бергә атлай, үҙен белем алыуға һәм хеҙмәткә бағышлай, ғаилә ҡора, балалар үҫтерә. Районда йәштәр сәйәсәте - социаль сәйәсәттең иң мөһим йүнәлештәренең береһе ул. Төп маҡсат – йәштәрҙең проблемаларын хәл итеү, уларға йәмғиәттә үҙ урынын табырға ярҙам күрһәтеү. Районда һәләтле, әүҙем йәштәр күп. Уларға үҙ уй-маҡсаттарын тормошҡа ашырыу, йәмғиәттең лайыҡлы ағзаһы булыу өсөн бар шарттар  булдырыу мөһим.

Комментарий:

Рөстәм Аҡбалин, «Нур» үҫмерҙәр һәм йәштәр клубы директоры:

• Район үҙәгендә йәштәр өсөн айырым урын булдырыу идеяһы электән бар ине. Уҙған йылда элекке банктың бинаһы һатып алынғас, уны төҙөкләндереү мәсьәләһе килеп тыуҙы. Ошоға бәйле «Йәшлек. Регион» төбәк программаһы конкурсында ҡатнашыуға заявка бирҙек һәм грант алыуға өлгәштек. Һөҙөмтәлә бина тулыһынса капиталь ремонтланды, матди-техник базаһы яңыртылып, яңы ҡорамалдар ҙа килтерелде. Саф һауала саралар үткәреү өсөн урам сәхнәһе ҡуйылған майҙансыҡ барлыҡҡа килде. Видеоконференциялар уҙғарыу өсөн махсус әҙерләнгән 20 урынлыҡ коворкинг-үҙәк буласаҡ. Инвалид балалар менән занятиелар өсөн уйын бүлмәһе, белгестәр өсөн кабинет (педагог-психолог,  өҫтәмә белем биреү педагогы, педагог-ойоштороусы, музыка етәксеһе) һәм башҡалар. Йәштәр йорто — йәштәрҙең  төрлө эшмәкәрлек өлкәләрендә ижади һәм һөнәри мөмкинлектәрен тормошҡа ашырыу өсөн майҙансыҡ, тип әйтер инем. Бында Хәйбулла егеттәре һәм ҡыҙҙары йәмәғәт проекттары өҫтөндә эшләйәсәк,   файҙалы идеяларын тәҡдим итеп, тәжрибә уртаҡлашасаҡтар.