Эшкә урынлашҡан ваҡытта хеҙмәт килешеүендә нимәне тикшерергә кәрәк?

Эшкә урынлашҡанда үҙ-ара телдән килешеүгә ризалашмағыҙ. Мотлаҡ хеҙмәт килешеүе төҙөгөҙ. Документҡа ҡул ҡуйыр алдынан уны иғтибарлап өйрәнегеҙ.

Эшкә урынлашыр алдынан нимәләрҙе тикшерергә кәрәк?

Вазифа бурыстары.
Улар килешеүҙә мөмкин тиклем ентекле билдәләнергә тейеш. Һеҙҙән вазифа бурыстарына инмәгән эште башҡарыуҙы талап итә алмайҙар.

Хеҙмәт шарттары.
Текста эш сәғәттәре, тәнәфес, шулай уҡ, хеҙмәт шарттары хәүефле йәки зарарлы булғанда, компенсациялар һәм өҫтәмә гарантиялар тураһындағы мәғлүмәт булыуын тикшерегеҙ.

Социаль гарантиялар.
Килешеүҙә мотлаҡ социаль страховкалау тураһында (ваҡытлыса эшкә яраҡһыҙлыҡ, бәхетһеҙ осраҡтар) бүлек булырға тейеш. Бынан тыш, эш биреүсе страховкалауҙың башҡа төрҙәрен дә, мәҫәлән, ирекле медицина страховкаһын да ҡарай ала.

Эш урыны.
Эшләйәсәк урынығыҙҙың дөрөҫ адресы күрһәтелгәнме-юҡмы икәнен тикшерегеҙ. Ситтән тороп эшләү ҡаралһа, ул да килешеүҙә теркәлергә тейеш.

Ғәмәлдә булыу ваҡыты.
Килешеү ваҡытлы һәм мөҙҙәтһеҙ булырға мөмкин. Ваҡытлы килешеүҙә уны төҙөү сәбәбен күрһәтәләр. Мәҫәлән, декреттағы хеҙмәткәрҙе алмаштырыу йәки миҙгелле эш башҡарыу. Килешеүҙә һынау ваҡыты ҡаралғанмы-юҡмы икәнен тикшерегеҙ.

Түләү.
Документта эш хаҡының суммаһы ғына түгел, ә мөмкин булған бөтә өҫтәмә түләүҙәр, премиялар, бонустар һәм уларҙы иҫәпләү шарттары ҡаралырға тейеш. Шуныһы мөһим: килешеүҙә эш хаҡы түләүҙең ваҡыты менән көнө аныҡ билдәләнергә тейеш.

#Аңлатабыҙ_Башҡортостан