Һаҡмарҙа биш килограмлыҡ суртан тотҡан!

Баймаҡ районының Ниғәмәт ауылынан Әмир Юлғотлин Һаҡмар йылғаһында биш килограмлыҡ суртан тотҡан. Был уның беренсе рекорды түгел — уҙған йылда ул ете килограмлыҡ балыҡ тотҡан булған.

«Һаҡмар балығы тәмле, ғаиләмде алабуға, сабаҡ, һыла һәм ҡыҙылғанат менән һыйларға яратам. Алыҫҡа йөрөмәйем — Һаҡмар йылғаһында балыҡ тотам, ҡайһы берҙә Талҡаҫ күленә лә барам».

Әмир Юлғотлин әйтеүенсә, балыҡ тотоу ҡомары уға көс-дәрт өҫтәй.

«Йәй көнө мин иртән һәм кисен икешәр сәғәт балыҡ тотам, ә ҡыш көнө был ваҡыт миңә нығыраҡ оҡшай. Тынлыҡ һәм саф һауа күңелемә рәхәтлек бирә», — ти ул. 

Шуны иҫтә тотоғоҙ: әле боҙҙоң иң хәүефле мәле. Ул йоҡа һәм үтә алдаҡсы. Йыл һайын ошондай боҙҙа республика буйынса унарлаған кеше, айырыуса яңғыҙ йөрөгән балалар һәм балыҡсылар һәләк була. 

Автор:Гүзәл Бикмәтова