Башҡортостан Йәмәғәт палатаһы ағзалары Хәйбулла районы халҡы менән осрашасаҡ

Башҡортостан Йәмәғәт палатаһы ағзалары Хәйбулла районы халҡы менән осрашасаҡ. Сара 23 октябрҙә район хакимиәтендә ике майҙансыҡта уҙғарыла.

Уларҙың береһендә граждандар ҡабул ителә, бында Хәйбулла районы халҡы мөрәжәғәттәрен Башҡортостан Йәмәғәт палатаһы контроленә тапшыра ала. Башҡортостан Республикаһы Йәмәғәт палатаһы аппараты етәксеһе Элина Ғатауллина ҡатнашлығында диалог була. Палата рәйесенең ҡултамғаһы менән дәүләт органдарына һәм проблеманы хәл итә алған башҡа ойошмаларға яҙма мөрәжәғәттәр өсөн бланктар тултырырға мөмкин.

Ошо уҡ майҙансыҡта Хәйбулла районы Йәмәғәт палатаһы рәйесе Илүзә Кәримова урындағы эшмәкәрлек йүнәлештәре тураһында һөйләйәсәк, сарала район етәкселеге ҡатнашасаҡ.

Икенсе майҙансыҡта Башҡортостан Йәмәғәт палатаһы ағзаһы Артур Ғилманов коммерцияға ҡарамаған ойошмаларҙың ресурс үҙәге эшмәкәрлеге менән таныштыра.

Осрашыу 13:00 сәғәттә башлана, адресы: Аҡъяр ауылы, Салауат Юлаев проспекты, 45.