Яҡташыбыҙҙың батырлығы менән ғорурланабыҙ

Башҡортостан яугиры махсус хәрби операция биләмәһендә бер алыш ваҡытында ВСУ-ның пилотһыҙ осҡосон юҡ итеп, иптәштәрен ҡотҡарған. Яңауыл районы Ҡарман ауылының батыр йөрәкле егете тураһында муниципалитет башлығы Салауат Ғилмиев хәрби часть командирынан ошондай йөкмәткеле хат алған.

Яҡташыбыҙ 2022 йылда мобилизацияланған, ул мотоуҡсылар батальонында водитель. Ай ярым самаһы элек ефрейтор эвакуация төркөмө составында хәрби бурысын үтәгәндә яраланған алты полкташын артиллерия һәм миномёт уты аҫтынан алып сыҡҡан. FPV-дрондарҙың аяуһыҙ һөжүм итеүенә ҡарамаҫтан, ул яралыларҙы эвакуациялау эшен дауам иткән. Дошмандың пилотһыҙ осоу аппараттары күбәйгәс, яугир үҙенең автоматынан ут асҡан һәм береһен  юҡ иткән.

Ҡыйыу башҡорт яугиры яраланған иптәштәренең һәм эвакуация төркөмө хәрбиҙәренең ғүмерен ҡотҡарып ҡалған, тип яҙа командир. А.С. әле лә хәрби бурысын үтәй. Эвакуация төркөмө составында ул подразделениеларға боеприпастар, эсәр һыу һәм аҙыҡ-түлек ташый.

«Шундай хаттарҙы уҡығас, егеттәребеҙ өсөн ғорурлыҡ тойғоһо кисерәһең. Яңауыл халҡы исеменән һеҙгә ҡыйыулығығыҙ һәм батырлығығыҙ, Ватанға тоғро хеҙмәтегеҙ өсөн рәхмәт белдерәм», — тип яҙҙы Салауат Ғилмиев үҙенең телеграм-каналында.