Һайлауға ғаилә менән килеү үҙе бер традицияға әйләнде

Һайлауға һәр кем үҙенсә әҙерләнеп бара. Мәҫәлән, Аҡъяр ауылында йәшәгән Аптиковтар һайлауға бөтә ғаиләһе менән килгән.

Илнур һәм Илнара әйтеүенсә, улар бәләкәйҙән балаларҙа әүҙем гражданлыҡ позицияһын тәрбиәләй. Һайлауға бөтә ғаилә менән беренсе тапҡыр киләләр: ата-әсәләр тауыш биреүҙең нисек үтеүен күрһәтергә ҡарар итә. "Беренсенән, бөгөн беҙ үҙебеҙҙең, республикабыҙ киләсәге өсөн генә түгел, балаларыбыҙҙың именлеге өсөн дә тауыш бирәбеҙ. Икенсенән, шәхси үрнәк менән балаларыбыҙға гражданлыҡ бурысын үтәргә өйрәтәбеҙ," - ти Аптиковтар.

Хәтерегеҙгә төшөрәбеҙ, 6, 7 һәм 8 сентябрҙә район халҡы Башҡортостан Башлығын һәм Хәйбулла районы Советы депутаттарын һайлай. Был мәлдә һәр беребеҙ тыуған төйәгебеҙҙең киләсәгенә йоғонто яһай ала. Барығыҙҙы ла һайлау участкаларына килергә һәм гражданлыҡ бурысығыҙҙы үтәргә саҡырабыҙ. Хәйбулла районында 60 һайлау участкаһы 6, 7 һәм 8 сентябрҙә урындағы ваҡыт буйынса иртәнге 8:00 сәғәттән 20:00 сәғәткә тиклем эшләйәсәк.   3 участкала Һайлау бюллетендәрен эшкәртеү комплексы (КОИБ) йәғни һайлаусыларҙың тауыштарын иҫәпләү өсөн электрон ҡоролма урынлашҡан.

Әйткәндәй, районда йәмғеһе 21 меңдән ашыу кеше һайлау хоҡуғына эйә, шуларҙың 200 самаһы тәүге тапҡыр тауыш бирәсәк. Оло йәштәгеләр, инвалидтар, ауыр сирле кешеләр, уларҙы ҡараусылар, шулай уҡ башҡа сәбәптәре булғандар өйҙә тауыш бирә ала. Бының өсөн участка һайлау комиссияһына уның эшләгән көндәрендә, шул иҫәптән һуңғы тауыш биреү көнөндә 14:00 сәғәткә тиклем мөрәжәғәт итергә кәрәк. Шунан һуң ғариза биреүсенең өйөнә тауыш биреү өсөн күсмә йәшник менән комиссия ағзалары килә.

Башҡортостанда 6, 7 һәм 8 сентябрҙә һайлау барышында “Рәхмәт-2024” традицион акцияһы үткәреләсәк.  Ғаиләләре менән һайлау участкаһына килгәндәргә QR-билеттар тапшырыласаҡ (шул иҫәптән – балаларға ла). Был билеттар ҡиммәтле приздар отоу форсаты бирә. Төп приздар – фатирҙар, автомобилдәр, квадроциклдар һәм башҡалар. Тулыраҡ мәғлүмәт рахмат.рф сайтында.