Робот-пылесос өй эштәрендә ярҙамсы булһын!

29 июлдә Башҡортостан юлдаш телеканалының тура эфирында 2024 йылдың икенсе ярты йыллығына республика, ҡала һәм район баҫмаларына яҙылыусылар араһында ҡиммәтле бүләктәр - мотоблок, туңдырғыс һандыҡ, робот-саң һурҙырғыс, ноутбук, телевизор уйнатылды. "Гәзит-журналдарға яҙыл һәм бүләк от" акцияһында ҡатнашыу өсөн «Башҡортостан Республикаһы» нәшриәт йортоноң ике баҫмаһына (республика, район йәки ҡала гәзит-журналдарына) 2024 йылдың икенсе ярты йыллығына яҙылырға кәрәк ине. 

Еңеүселәр исемлегендә хәйбуллалар ҙа бар –  Мәмбәт ауылынан  Сәлимә Ҡарабаева робот-саң һурҙырғыс отто! Оҙаҡ йылдар мәктәптә рус телен һәм әҙәбиәтен уҡытҡан уҡытыусы был ҡиммәтле бүләкте алып ҡыуанды. 

– Район һәм республика баҫмаларына гелән яҙылып торам. Гәзиттәрҙә республика, ауыл тормошо, ябай ауыл кешеләре, өлгөлө ғаиләләр, ауыл хужалығы тураһындағы мәҡәләләр оҡшай һәм яратып уҡыйым. Отош уйынына гәзиткә яҙылған һайын квитанцияларҙы ебәреп торам. Ғүмер буйы уҡытыусы булып эшләнем, әлеге ваҡытта хаҡлы ядамын, мал-тыуар көтәм, баҡса үҫтерәм. Ошондай отош уйындары үткәрелеп торһон, баҫмаларға яҙылыусылар кәмемәһен, –  тип теләне "Хайбуллинский вестник" һәм "Йәшлек" гәзиттәрен алдырған Сәлимә Әхмәт ҡыҙы.

Даланлы инәйҙең шатлығын уртаҡлашырға «Башҡортостан Республикаһы» Нәшриәт йорто предприятиеһы филиалының Республика мәғлүмәт үҙәге директоры Айнур Дәүләтбәков шәхсән килеп, бүләк тапшырҙы.

–“Башҡортостан Республикаһы”  Нәшриәт йорто баҫмаларына яҙылып, иғлан иткән акцияла гәзит уҡыусылар ҡиммәтле бүләктәр алып ҡыуана.  Хәйбулла районынан да гәзит-журналдар алдырыусылар отош уйынында йыш ҡатнашып, быйыл да бүләкле булдылар. Мәмбәт ауылынан Сәлимә Ҡарабаеваға был робот-пылесос 75 йәшлек юбилейына иҫтәлекле бүләк булып, оҙаҡ йылдар хеҙмәт итһен. Әйткәндәй, был уның беренсе буләге түгел, ике йыл элек ул бензин бысҡыһы отҡан ине. Беҙҙең гәзиттәргә даими рәүештә яҙылғандарҙың бүләк отоуы ҡыуандыра, – тине Артур Хәсән улы.

Гәзит уҡыусы дуҫтарыбыҙҙы иҫтәлекле бүләктәре менән ҡотлайбыҙ. Киләсәктә лә тоғро дуҫтар булып ҡалығыҙ, "районка" менән бергә булығыҙ.

Бынан алда хәйбуллалар ҡар таҙартыу машинаһы, планшет, ноутбук та отҡайны. Ҡиммәтле бүләктәрҙең бәхетле эйәһе һеҙ ҙә була алаһығыҙ. квитанциялар ебәрегеҙ, отош уйынында ҡатнашығыҙ!

Хәтерегеҙгә төшөрәбеҙ, 1 июлдән 2025 йылдың 1-се ярты йыллығына һәм 2025 йылға ваҡытынан алда яҙылыу кампанияһы башланды. Был осорҙа уҙған ярты йыллыҡ хаҡтары буйынса ташлама менән яҙылырға мөмкин. "Гәзит-журналдарға яҙыл һәм бүләк от" акцияһында ҡатнашыу өсөн квитанцияларҙы ебәрергә онотмағыҙ.