"Башҡорт ихаталары"- өҫтөнлөклө проекттарҙың береһе

«Башҡорт ихаталары» программаһы граждандар өсөн күп фатирлы йорттарҙа йәшәү шарттарын төҙөкләндереүгә йүнәлтелгән. Проекттың маҡсаты - Башҡортостан Республикаһы биләмәһендә урынлашҡан күп фатирлы йорттарҙа граждандар өсөн уңайлы йәшәү шарттары булдырыу, ихата биләмәләрендә уңайлы мөхит булдырыу.

Республика Башлығы Радий Хәбиров башланғысы менән Башҡортостанда "Башҡорт ихаталары" ихата биләмәләрен төҙөкләндереү программаһы 2019 йылдан ғәмәлгә ашырыла. Программаның биш йылында 400 мең кеше йәшәгән 1326 ихата төҙөкләндерелде. Программаны тормошҡа ашырыуға средстволарҙың күбеһе республика бюджетынан бүленә. Төҙөкләндереү тураһында ҡарар торлаҡ хужаларының дөйөм йыйылышында коллектив ҡабул ителә. Программа үҙ эсенә балалар һәм спорт майҙансыҡтары төҙөүҙе, йәшелләндереүҙе, парковкаларҙы төҙөкләндереүҙе һәм башҡа эштәрҙе ала. Эш сифаты белгестәр тарафынан контролдә тотола һәм халыҡтың фекерен иҫәпкә ала. Программа халыҡтан ыңғай кире бәйләнеш ала һәм үҫешен дауам итә.

Радий Хәбиров быны республиканың торлаҡ-коммуналь хужалыҡ өлкәһендәге өҫтөнлөклө проекттарының береһе тип билдәләне. “Мин, әгәр беҙ ихатаға инһәк, барыһын да тәртипкә килтерергә кәрәк, тигән фекерҙе яҡлайым. Шунда уҡ подъездар төҙөргә, ҡыйыҡты, фасадтарҙы тәртипкә килтерергә», – тине Радий Хәбиров.

Хәйбулла районында программаның биш йыл эсендә 24,2 миллион һумдан ашыу суммаға алты ихата төҙөкләндерелде.

2019 йылда был программа буйынса Аҡъяр ауылының Йәштәр урамындағы күп ҡатлы йорттарҙың ихаталары подъездарға тротуар юлдарын алып барыу менән яңыртылды, шулай уҡ Бүребай (Шайморатов урамы, 9-10, Шахтер урамы, 21), Подольск (Юбилей урамы, 1,2,3,4), Татыр-Үҙәк (Еңеү урамы, 8,10,12,14,16; Тыныслыҡ тыҡрығы, 2), Өфө ауылдарында (Хоҙайбирҙин урамы, 31-39) ремонт эштәре башҡарылды.

2020 йылда Маҡанда (Әхмәтшин урамы, 4,6,8,10,12) һәм Садовыйҙа (Йәштәр урамы, 1,2,3,4, Яңы урамы, 4,6) күп фатирлы йорттарҙың йорт яны биләмәләре төҙөкләндерелде. Ихаталарҙа тротуарҙарҙа һәм юл өлөшөндә асфальт япма, яңы парковка урындары, хәүефһеҙ резина япмалы балалар уйын һәм спорт майҙансыҡтары барлыҡҡа килде.

2022 йылда «Башҡорт ихаталары» программаһы сиктәрендә Аҡъярҙа һәм Бүребайҙа ике ихата биләмәһен төҙөкләндереү буйынса эштәр башҡарылды. Ихаталарҙа йәшәүселәр асфальтлы ихата, тротуар юлдары, йыһазландырылған парковкалар, балалар өсөн уйын майҙансыҡтары алды (Аҡъяр - контракт суммаһы 3 млн.759 мең һум, Бүребай - 5 млн. 807 мең һум).

Тағы ла Аҡъяр ауылының С.Юлаев проспекты, Юбилей, Батанов, урамдарында квартал эсе территорияларын төҙөкләндереү планлаштырыла.

-"Башҡорт ихаталары" - торлаҡ-коммуналь хужалыҡ өлкәһендә иң яҡшы проект. Был программаны мотлаҡ дауам итәсәкбеҙ. Мөмкин тиклем йорт яны биләмәләрен яңыртыуға өҫтәмә аҡса бүлергә тырышасаҡбыҙ, – тип һыҙыҡ өҫтөнә алды республика башлығы.