Владимир Путин яҡташтарыбыҙға маҡтаулы исемдәр тапшырҙы

Рәсәй президенты Владимир Путин биш яҡташыбыҙға маҡтаулы исемдәр биреү тураһында указға ҡул ҡуйҙы. Рәсми документ хоҡуҡи мәғлүмәт интернет-порталында баҫылған.

«Башҡортостан» телерадиокомпанияһында мәғлүмәт тапшырыуҙарының төп редакцияһының махсус хәбәрсеһе Рәмзиә Кәримова-Байбулатова илебеҙ журналистикаһын үҫтереүҙәге ҡаҙаныштары һәм күп йыллыҡ емешле хеҙмәте өсөн Рәсәйҙең атҡаҙанған журналисы исеменә лайыҡ булды.

«Нефтегазстрой» йәмғиәте директоры Нурихан Дилмиев һәм «Ремонт-төҙөлөш үҙәге» йәмғиәтенең техник директоры Рафаил Исмәғилев «Рәсәй Федерацияһының атҡаҙанған төҙөүсеһе» исемдәрен алды.

«БашЖилСервис» йәмғиәте директоры Илфат Ҡотлобулатов — Рәсәйҙең атҡаҙанған торлаҡ-коммуналь хужалыҡ хеҙмәткәре, ә Өфөнөң 32-се спорт мәктәбе тренеры-уҡытыусыһы Олег Назаровҡа илдең атҡаҙанған физик культура хеҙмәткәре тигән маҡтаулы исем бирелде.

Бынан алдараҡ дәүләт башлығы указы менән Благовещен районынан Ольга Фатеева «Герой-әсә» исеменә лайыҡ булды.

https://www.bashinform.ru/news/social/2024-05-03/vladimir-putin-prisvoil-zhitelyam-bashkirii-pochetnye-zvaniya-3751988