Башҡортостанда температураның -45 градусҡа тиклем түбәнәйеүе теркәлгән

Бишбүләк районының Каменка ауылында 11 ғинуар төнөндә термометр температураның -45 градусҡа тиклем түбәнәйеүен теркәгән. Был хаҡта «Бәйләнештә» социаль селтәрендәге урындағы пабликтар хәбәр итә, Башҡортостан буйынса Ғәҙәттән тыш хәлдәр министрлығының матбуғат хеҙмәтендә лә мәғлүмәт раҫланды.

Ведомство мәғлүмәттәре буйынса, райондың башҡа тораҡ пункттарында ла үтә һыуыҡ булды: Йылболаҡтамаҡ, Айыт -40 градус, Уҫаҡкисеү һәм Баҙлыҡ -39 градус, Дим -36 градус.

«Сатлама һыуыҡтарҙа күп ҡатлылыҡ принцибы буйынса кейенергә һәм урамға сыҡмаҫҡа, ауыҙҙы һәм танауҙы ябырға кәрәк. Янғын хәүефһеҙлеге йәһәтенән: ҡулдан эшләнгән электр йылытҡыстар ҡулланмағыҙ, электр селтәрен артыҡ йөкләмәгеҙ;  өйҙә һәм балкондарҙа газ баллондарын һаҡларға ярамай. Хәтерегеҙгә төшөрәбеҙ, әгәр тулыһынса тултырылған баллонды һыуыҡтан йылыға күсерһәгеҙ, газ киңәйә һәм боҙолған һауыт шартлай ала», — тип иҫкә төшөрҙөләр Башҡортостан буйынса Ғәҙәттән хәлдәр министрлығында.

Бынан алда «Башинформ» Башҡортостанда йәшәүселәрҙе «температура тирбәлеүе» көтөүе хаҡында хәбәр иткәйне.