Сираттағы еңеүселәр бүләк алып ҡыуанды

Вәлимә инәйҙең ҡыҙы Флүза Әбделмәнова әсәһенең даланлы булыуын билдәләп: “Оло йәштәге атайым менән әсәйем Хәйбулла хәбәрҙәре гәзитен бер йылда ла ҡалдырмай яҙылып, район һулышы менән танышып баралар. Бынан тыш, республика гәзит-журналдарынан да ҡалмайҙар. Әсәйем даланлы кеше булып сыҡты, аҙна һайын отош уйнына квитанцияһын гәзиткә яҙылғас та, уның ҡушыуы буйынса алып килеп төшөрәбеҙ һәм уйында бүләкте өсөнсөгә отто. Был юлы ла бүләген алып барып биреп ҡыуандырасаҡмын. Отҡан бүләге, өҫтәл лампаһы аҫтында, әйҙә рәхәтләнеп гәзит-журналдар уҡыһын”, - тине.

Гәзит уҡыусы дуҫтарыбыҙҙы иҫтәлекле бүләктәре менән ҡотлайбыҙ. Киләсәктә лә тоғро дуҫтар булып ҡалығыҙ, гәзит менән бергә булығыҙ.

Ә “Аҙна һайын приз” уйынының һуңғыһы һәм супер-приз ит турағыс 25 декабрҙә уйнатыласаҡ.

Луиза Юлмөхәмәтова.

Мостафа Мәмбәтов, Сәғит ауылы:

• Район гәзите менән атай-әсәйҙәр алдырған ваҡыттан, йәғни бала саҡтан танышмын. Мәктәптә уҡыған саҡта иң тәүҙә һүрәттәрен ҡарап ала торғайныҡ, шунан уҡый инек. Шунан бирле бер ваҡытта ла гәзиттән өҙөлгәнебеҙ юҡ. Сәғиттә тыуып үҫеп, ғүмер буйы ауылымда йәшәйем, хаҡлы ялдамын. Колхозда тракторсы булып эшләнем, ғүмер буйы К-700-та йөрөнөм. Шуға ла миңә гәзиттә ауыл тормошо, ябай ауыл кешеләре, өлгөлө ғаиләләр, ауыл хужалығы тураһындағы мәҡәләләр оҡшай һәм яратып уҡыйым. Отош уйынына гәзиткә яҙылған һайын килеп төшөрә торғайныҡ, быйыл, ниһайәт, беҙгә лә бәхет йылмайҙы һәм бүләк оттоҡ. Термос бик кәрәкле әйбер. Бер яҡтан, бүләк ауыл малы көтөүен көткәндә, ҡырҙа бесән әҙерләгәндә бик уңай буласаҡ. Икенсенән, яратҡан гәзитебеҙҙән матур иҫтәлек.

Луиза Иҫәнгилдина, Иҫәнгилде ауылы:

- Район гәзитен “Хеҙмәт байрағы” тип аталған сағынан алдырып, бабай менән ярышып уҡыйбыҙ. Уйынға уңайы килгән һайын квитанция төшөрөп китә инем, быйыл, ниһайәт, миңә лә бүләк оторға насип булды. “Дөйә лә бүләк, төймә лә бүләк” тигәндәй, бик шатланып, дәртләнеп киттем. Республика уйындарына ла ебәрергә кәрәк тип уйлап ҡуйҙым. Уйын өсөн рәхмәт, артабан да эшегеҙҙә уңыштар.

Шәрифулла Ишкилдин, Аҡнаҙар ауылы:

• Район гәзитен иҫ белгәндән алып уҡыйым һәм яратам. Әле 90 йәште ҡыуалайым. Почтальонканы гәзит килер көнө, тышҡа сығып уҡ көтөп торам. Бер уҡып сығып, кәрәкле, ҡыҙыҡлы мәҡәләләрҙе бөкләп, аҫтына һыҙып һалып ҡуям да, тағы ла сығарып уҡыйым. Бүләккә килгәндә, бер ҙә генә лә отҡаным юҡ ине. Быйыл бүләкле лә, гәзитле лә булдым, рәхмәт.