Башҡортостандың хәрби комиссары Михаил Блажевич республикала ҡасан өлөшләтә мобилизация тамамланасағы тураһында әйтте. Уның һүҙҙәренсә, әле сара дауам итә, әммә ил буйынса ҡуйылған дөйөм срокта – 28 октябрҙән алдараҡ туҡтатыласаҡ. Был турала ул “Бизнес Фм Өфө” радиоһына биргән интервьюһында белдерҙе.
– Беҙҙә мобилизация дауам итә, барыһы ла планға ярашлы бара. Бөтә төбәктәрҙә лә ваҡыт билдәләнгән – кемдер иртәрәк, кемдер һуңыраҡ, һәм бер ниндәй ҙә өҙөклөккә нигеҙ юҡ. Билдәләнгән ваҡытта, илдә иғлан ителгән 28 октябргә тиклем тамамлаясаҡбыҙ, – тине Блажевич.
Уның әйтеүенсә, планды арттырып үтәү мөмкин түгел. Штаттары булған тәғәйен хәрби частар ойошторола, уларҙа тейешле иҫәп билдәләнгән. “Әгәр планда ҡаралғандан артығыраҡ йыйһаҡ, был кешеләргә кейем-һалым, ашарға еткереп тә, эш хаҡы түләп тә булмаясаҡ”, – тине хәрби комиссар.
Республика Башлығының һәм хакимиәт башлыҡтарының яҡшы ойошторолған ярҙамы, барлыҡ структураларҙың үҙ-ара килешеп эш итеүе һөҙөмтәһендә киҫкен мәсьәләләр тиҙ хәл ителә, ялыуҙар, мөрәжәғәттәр кәмегән.
– Эйе, ҡатмарлыҡтар булды һәм системаны яйлап төҙөргә, шул иҫәптән норматив-хоҡуҡи базаға төҙәтмәләр индерергә, мобилизацияланғандарҙың ҡайһы берҙәрен өйҙәренә ҡайтарырға тура килде. Хәлде яйға һалыу, яңылышлыҡтарға юл ҡуймау өсөн барыһын да эшләйбеҙ, – тине хәрби комиссар.
Фото: "Республика Башкортостан".