+23 °С
Облачно
Яңылыҡтар
26 Мая 2021, 05:35
Башҡортостанда үтәсәк VI Бөтә донъя Фольклориадаһына 55 илдән 2 мең ҡатнашыусы килеүе көтөлә
-
Кисә Башҡортостан Республикаһы Башлығы Радий Хәбиров VI Бөтә донъя Фольклориадаһын әҙерләү һәм үткәреү буйынса ойоштороу комитеты ултырышында ҡатнашты. Ултырышты видеоконференция аша Рәсәй Хөкүмәте рәйесе урынбаҫары Татьяна Голикова уҙғарҙы.
Иҫегеҙгә төшөрәбеҙ: 14 майҙа Өфөлә “Фольклориадаға тиклем 50 көн” тигән кире иҫәпте асыу тантанаһы булды.
– Был етди, ҙур ваҡиға. Башҡортостан менән Рәсәйҙең мәҙәниәт министрлығы бергәләшеп ҙур әҙерлек эштәрен үткәрҙе. Күп ҡунаҡтар көткәнде иҫәпкә алып, Фольклориадала эпидемиологик хәүефһеҙлекте күҙәтеүгә айырым иғтибар бүлергә кәрәк, – тине Т.Голикова. Ул фольклор фестивален ойоштороусыларҙы, ҡатнашыусыларҙы, улар менән тығыҙ бәйләнештә эшләйәсәк кешеләрҙе, шул иҫәптән ирекмәндәр, транспорт водителдәре һәм башҡаларҙы вакциналау буйынса мөмкинлектәрҙе киң ҡулланырға кәрәген дә өҫтәне.
Халыҡ-ара сараны әҙерләү һәм үткәреү тураһында статс-секретарь – Рәсәйҙең мәҙәниәт министры урынбаҫары Алла Манилова ентекле итеп һөйләне. Ул, 55 рәсми сит ил делегацияһының 48-е Фольклориадала ҡатнашыуҙы раҫланы, тип хәбәр итте.
CIOFF ҡағиҙәләренә ярашлы, фестивалдә һәр ил менән бер ижади коллектив таныштыра. Рәсәй исеменән Пензаның “Вензеля” хореография ансамбле ҡатнаша.
Концерт номерҙарынан тыш, Фольклориада программаһына халыҡ кәсептәренең халыҡ-ара күргәҙмәһе һәм матди булмаған мәҙәни мираҫты һаҡлау буйынса CIOFF-тың конференцияһы индерелгән.
Башҡортостан Башлығы үҙ сығышында, республика мөһим мәҙәни сараға әҙерлекте тамамлау кимәленә сыҡты, тип билдәләне.
– Бөтә донъя Фольклориадаһына старт 3 июлдә “Өфө-Арена” майҙанында биреләсәк. Унда 800-ҙән артыҡ артист ҡатнаша. Ә 4 июлдән алып 9-ына тиклем форумдың төп концерт майҙаны – “Торатау” конгресс-холының амфитеатрында, “Фольклориада йөрәге” фестивале үтәсәк, – тине Р.Хәбиров.
Концерт көн һайын фольклор фестивале ҡатнашыусыларының сығыштарынан башланып, донъя кимәлендә танылыу яулаған коллективтарҙыҡы менән тамамланасаҡ. Улар иҫәбендә – “Русская песня” ансамбле, Кубань дәүләт академия казак хоры, “Вайнах” Чечен дәүләт бейеү ансамбле, Мәскәүҙең волынкала уйнаусылар оркестры, Рәсәй исеменән быйылғы “Евровидение”ла сығыш яһаған Манижа, Франциянан “Planteс”, Ҡаҙағстандан “Ulytau”, Рәсәйҙән "The Hatters” рок-төркөмдәре.
Программа республиканың баш ҡалаһы менән генә сикләнмәй. 22 муниципалитетта ла Фольклориадаға әҙерлек әүҙем бара.
Фестивалдең ҙур саралары телеэфир аша ла, интернет-майҙандарҙа ла, шул иҫәптән социаль селтәрҙәрҙә, яҡтыртыла. Байрамда 600 ирекмән эшләй. 10 июлдә шул уҡ амфитеатрҙа халыҡ-ара фольклор фестивален ябыу тантанаһы ойошторола. Республика Башлығы Фольклориаданың юғары кимәлдә үтеүенә һәм унда ҡатнашыусыларҙың хәүефһеҙлеген тәьмин итеүгә ныҡлы ышаныс белдерҙе.
Әйткәндәй. СНГ илдәренән Фольклориадала Белоруссия, Ҡаҙағстан, Үзбәкстан, Ҡырғыҙстан, Әзербайжан ҡатнашырын раҫлаған. Европанан Франция, Италия, Австрия, Испания, Греция, Швейцария, Эстония, Венгрия, Болгария, Хорватия, Төньяҡ Македония, Польша, Черногория килә. БРИКС илдәренән – Һиндостан, Көньяҡ Африка Республикаһы (ЮАР); Яҡын Көнсығыштан – Израиль, Фәләстан, Берләштерелгән Ғәрәп Әмирлектәре; Латин Америкаһынан – Мексика, Чили, Колумбия. АҠШ делегацияһы, Африканан Мысыр менән Алжирҙыҡылар ҙа килергә ниәт тота.
Сығанаҡ: https://glavarb.ru/
Гөлдәр Кадаева.
Фото:www.youtube.com
